Accessibility links

пәнҗешәмбе, 8 декабрь 2016, Казан вакыты 19:01

Ğäräp dönyası Bush çığışına nindi mönäsäbät belderä?


Ğiraq totqınnarın mäsxärä itkän amerikan xärbilären tänqitlägän çığışın George Bush ğäräp telekanallarında, ğäräp dönyası öçen yasadı. Ämmä ğäräp dönyası amerikan prezidentın işetä aldımı soñ?

Başlap şunı äytergä kiräk, ğäräp dönyasınıñ ber öleşe bu çığşını, törle säbäplärdän, ğömümän işetmägän. Misal öçen, Bagdadnıñ zatlı sanalğan Ädhämiä bistäsendä yäşäwçe Äxmät, Azatlıqqa äytüençä, alarda ul könne elektr bulmağan:

Audio (Ähmät)

"Min çığışnı işetä almadım, bezdä elektr bulmadı. Närsä söylägänen belergä bik telär idem, läkin älegä çığışnı işetkän keşene oçratmadım."

Ämmä çığışnı işetü bäxetenä ireşkän ğäräplär öçen dä anıñ yoğıntısı zur bulmağan axrı. Misal öçen, Bagdadta yäşäwçe Wahad Mostafa Äl-Caf, Bushnıñ süzläre genä citmi dide:

Audio (Wahad Mostafa Äl-Caf)

"Bush Ğiraq xalqı aldında ğafu ütenmäde. Ul Ğiraqqa kilep, qorbannarnıñ ğailäläre aldında ğafu ütenergä, yä isä kompensatsiä birergä tieş."

Döres, Bushnıñ çığışın xuplawçılar da bar. Misal öçen, Ğiraq kördläre. Körd jurnalistı Hiwa Osman süzlärençä, kördlär fikerençä, amerikan xärbiläreneñ totqınnarnı cäberläw ğälämätläre Amerikan säyäsäten çağıldırmıy, alar bar tik ayırım çığarmalar bulıp tora. Osman äytüençä, Bush ta, Blair da, ber nigä qaramıyça, Tönyaq Kördstanda popular citäkçelär bulıp qala:

Audio (Hiwa Osman)

"Monda Bush bik popular, xättä körd citäkçelärennän dä popularraq. Qaysı ğına kibetkä kersägez dä, sez yä Bushnıñ yä Blairnıñ fotoräsemen kürä alasız. Kördlär öçen alar azat itüçelär. Alar bulmasa, suğış ta bulmas ide, Saddam da kitmäs ide."

Şulay da, bar ğäräp dönyasın alğanda, Bushnıñ çığışı Amerikağa bulğan näfrätne kimetä almas sıman. Bu fiker belän Äl-Cäzirä televideniese wäkile Cihad Ballut ta kileşä. Älegä çığışta iñ möhim bulğan, Amerikanıñ Yaqın könçığış säyäsäte mäsäläse bötenläy kütärelmägän. Ballut Azatlıqqa bolay dide:

Audio (Cihad Ballut)

"Ğäräp mäglümät çaralarında häm uramda äytelgän berençe fikerlär şunı kürsätä: xalıqnıñ Amerikağa, anıñ yaqın könçığış säyäsätenä qarata fikere üzgärmiäçäk."

Ballut süzlärençä, Amerikanıñ İzrailne xuplaw säyäsäte, ğäräp dönyası öçen, bälki, totqınnar yazmışınnan da möhimräk närsä. Amerikanıñ Ğiraq suğışın häm ğömümän Yaqın könçığış säyäsäten tänqitlägän Äl-Cäzirä televideniese ğäräp dönyasında iñ nıq qaralğan kanal bulıp tora. Ämmä Bush üzeneñ çığışı öçen bu kanalnı saylamadı. Bu da çığışnıñ ğäräp dönyasına bulğan tä''siren bermä-ber kimette.

Ali Gilmi, Praga
XS
SM
MD
LG