Accessibility links

Кайнар хәбәр

Tatnet: İnternetta işetelä torğan tatar awazları


Zamanında, radio dulqınnarınıñ tatar süzen yıraqlarğa tarata aluı, şaqqatıra ide. Xäzerge internet texnologiäläre, dönyanıñ ber cirendä yañğırağan cırlarnı, cir şarınıñ ikençe yağına işetterergä mömkinlek birä. İnternet üze yaña äyber bulsa, ğlobal çeltär aşa tapşırular alıp baru – annan da yañaraq küreneş ide. Alay da, tatar radiolarına da ul äyber barıp citte. Berençelärdän bulıp, internet aşa «Dulqın» radiosı tapşırıla başlağan ide. Ä «Yaña ğasır» radiosı signalın sputnik aşa ğına tarata. Bu radionıñ xätta möstäqil saytı da yuq. Ğlobal çeltärdä barı TNV tele-radiokompaniäseneñ räsmi säxifäsen genä tabıp bula.Ä menä «Tatar radiosı» radio efirda eşläw belän bergä, internet çeltärenä dä ütep kerergä buldı. Xäzer tatar süzen yıraq Amerika, Avstraliä häm Evropa illärendäge millättäşlärebez dä işetä ala. Bu xaqta saytnıñ forumındağı yazular da söyli. Anda dönyanıñ törle illärendä yäşäwçe millättäşlärebez, başta, tatarça cır işetü mömkinleklärenä şatlıq beldergän bulsalar, soñraq, radio eşenä qağılışlı täqdimnären citkerügä barıp citte. «Tatar radiosı»nıñ baş möxärrire Ämir İslamovnıñ äytüenä qarağanda, on-line tapşırular alıp baru, radioğa, däräcä öçen kiräk. Häm kiläçäktä, radio xucaları anı, dönya tatarlarına yünälgän reklama qoralı itep qullanırğa da, isäpläp tora. Älegä reklama az, ä tıñlawçılar sanı, çınnan da, artqan. Ämir İslamovnıñ äytüenä qarağanda, soñğı 4 ayda, saytqa 20 meñ yaña qullançı kerep, turı efirğa totaşqan. «Tatar radiosı»nıñ saytı www.tatarradio.ru adresında urnaşqan. Ul anda täwlek buyı uynap tora. Häm härwaqıt anı tıñlawçılar bar. Forumdağı yazularğa qarağanda, Evropadağı tatarlar radionıñ köndez yañğırağan programmaların tänqitli yä maqtıy, Amerikadağı tatarlar isä, tönge efirğa qarata fiker belderä. Bu radionı on-line da işetergä teläsägez www.tatarradio.ru saytına kerep, «turı efir» töymäsen ezlägez. «Azatlıq» radiosı da täwlekkä 4 tapqır internet çeltärendä tapşırıla. Şulay uq, bezneñ 1 säğätlek programmanı kompyuterığızğa küçerep alu mömkinlege bar. Adresıbız şul uq. www.azatlıq.org. Säxifädä «bezne tıñlaw» digän bülekkä iğtibar itegez.

Bikä Timerova
XS
SM
MD
LG