Accessibility links

шимбә, 3 декабрь 2016, Казан вакыты 12:42

9 Mayda Groznıy stadionında bulğan şartlaw näticäsendä Çeçnya prezidentı Äxmät Qadırov xäläk buldı


Şartlaw Groznıynıñ "Dinamo" stadionında 11-nçe yartılarda Ciñü könenä bağışlanğan tantana waqıtında, parad betep konsert başlanırğa torğanda yañğırağan. Şartlatqıç yuğarı qunalqar utırğan tribuna astına quyılğan dip farazlana. Ülüçelär arasında yuğarı räsmilär bar, şul isäptän, Çeçnya prezidentı Äxmät Qadırov. Çeçen xökümäte şulay uq parlament räise Xösäyen İsaevnıñ da ülüwen rasladı. Berençe xäbärlärdä Rusiäneñ Tönyaq Kavkazdağı ğäskär başlığı Valeri Baranov ta ülgän dielgän ide. Läkin soñraq, ul isän, awır cäräxätlär belän xastaxanägä kiterelgän dip xäbär itelde. Yaralanuçılar arasında Çeçnya militsiäse başlığı Alu Alxanov belän Çeçnya komendantı Grigori Fomenko da bar. Ülüçelär arasında ber jurnalist Reuters xäbärçese Adlan Xasanov ta bar dip dielä. Qorbannar sanı turında älegä tögäl mäglümät yuq. Rusiäneñ Ğädättän tış xällär ministrlığı 4 keşe ülgän, 40-tan artığı yaralanğan dip belderä. Rusiäneñ mäglümät çaraları ülüçelär sanı distädän artıq dip xäbär itä. Rusiä televideniese kürsätkän sürätlärgä qarağanda, şartlaw ul qädäre köçle bulmağan, tribuna işelep töşmägän, ämmä yuğarı qunaqlar utırğan urında zur tişek xasil bulğan. NTV televideniese şartlawdan soñ iminlek xezmätläreneñ tirä yaqqa ut açuın, qurıqqan xalıqnıñ çabışa başlawın kürsätte:

Audio (atu tawışları)

Bu xäcüm öçen älegä berkem dä cawaplılıqnı üz ösenä almadı. Rusiä räsmiläre, tribuna astına mina quyılğan dip belderä. Näq şundıy mina 2 yıl elek 9 May bäyräme waqıtında Dağıstannıñ Kaspiyski şähärendä şartlatılğan ide. Çeçennarnıñ İnternet säxifäse şartlawnı intihar xöcümçe başqarğan bulırğa mömkin dip belderä.

Rusiä prezidentı Vladimir Putin, bügen Kremldä Qadırovnıñ ulı Ramzan belän oçraqşannan soñ, Äxmät Qadırov tormıştan kitte läkin ciñelmäde, digän süzlär äytte:

Audio (Vladimir Putin)

"Soñı 4 yıl eçendä Qadırov üz xalqı aldında burıçın ütäp kilde. Ul çın qaharman ide, üzeneñ bar eşçänlege belän bandit-terrorçılar belän xalıq arasında tigzelke bilgesen quyıp bulmağanın kürsätte."

Putin bu xöcümne oyıştıruçılardan üç alırğa wäğdä itte.

Äxmät Qadırov berençe Çeçen suğışı waqıtında Federal köçlärgä qarşı suğışqan keşe, ämmä soñnan qaraşın üzgärtep Mäskäw yağına küçte. 1999 yılda Çeçnya prezidentı Aslan Masxadov anı "çeçen xalqına qarşı" digän añlatma belän Çeçnya möftie urınınnan çitlätü turında qarar çığardı. Qadırovnı üterü tırışlığı belän inde 3 tapqır xöcüm yasalğan ide. 2000 yılda Rusiä prezidentı Putin anı Çeçnya administratsiäse başlığı itep bilgeläde. Uzğan yılnıñ üktäberendä Qadırov Çeçnya prezidentı bulıp saylanğan ide.

Prezident wazifaları waqıtlıça Çeçnya premier-ministrı Sergei Abramovqa tapşırıldı. Rusiäneñ Eçke eşlär ministrlığı Groznıyda bulğan şartlaw uñayınnan berniçä keşeneñ qulğa alınuın belderde.

Ali Gilmi, Praga
XS
SM
MD
LG