Accessibility links

дүшәмбе, 5 декабрь 2016, Казан вакыты 17:43

Araqı şeşäläre geografiägä öyrätä


Bilgele bulğança, här töbäkneñ üz simvolı, üz tamğası bar. Bigräk tä milli respublikalarnıñ, millätlärneñ simvolları härkemne qızıqsındıra. Tatarstannıqı Aq Bars, Söyembikä manarası, Başqortstannıqı Quray çäçäge, atqa atlanğan Salawat Yulaev häykäle bulğan kebek başqalarnıñ da üz simvolikası bar. Ä ayırım töbäklärneñ bixisap firmalarınıñ üz simvolı, üz markası bar mikän? Çit ilneñ ataqlı firmaları Qoka Qola, viski kebek eçemleklärne tamğa tamğaları buyınça taratsalar, elekke SSSRda xämer eçemlekläre, tämäke satqanda däwlät simvolları yäki ayırım şäxeslärneñ isemnäre reklama öçen qullanıla.
Bu ölkädäge bügenge xällär här keşegä tanıştır. Şulay da bügen Qazan üzägendä urnaşqan zur ber kibetkä kerep çığarğa buldım. Başta xämer eçemlekläre satılğan bülekkä kittem. Anda närsälär genä yuq! Vitrinağa ber genä qarasañ da küzläreñ qamaşa. Matur itep bizälgän ällä niçä distä törle şeşälär, nindien teliseñ, zurısı da, keçeräge dä bar. Çit illärneke genä ber-ike distä kürenä. Näq üzebezdä çığa torğannarın tezep kitsäñ, alar arasında «Staraya Qazan», «Vaş Vıbor», «Xanskaya», «Salawat» häm başqalar bar. Menä Penzanı da iskä töşerik, andağı Quz'miç araqısı gubernator Vladimir Kuz'miç Boçkarev isemen yörtä. Gubernatorskaya digäne däräcäle araqı dip sanala. Şundıy uq xällär Samara häm başqa töbäklärdä dä. Başqortstandağı kibetkä küz salsañ, şeşädäge etiketkalarında «Ufimskaya», «Belebeevskaya», «Aksakovskaya» digän yazu küräseñ, boları menä Başqortstannıñ simvolları inde.
Ä xalıq nindi araqını eçä digän sorawğa beräwlär, xälleräkläre yäki sälämätlek yağınnan yomşağraqları araqınıñ sıyfatlısın saylıy, isemenä, bäyäsenä qarap tormıy. Ä ğadi eçüçelär kiresençä araqınıñ arzanrağın qarıy. Quz'miç, Gjelka dip zatlısın ezlämi.
Tämäke belän dä şundıy uq xäl. Canıñ nindien teli, räxim itep şunısın sayla. Kübräge inde çit ilneke häm Rusiäneke. Tatarstanda çığarılğan «İl'bar» tämäkese, «Aqtanış tañnarı» papirosların xäzer inde satılmıy, çönki Qazandağı tämäke fabrikası tuqtalğan. Ä Aqtanış tañnarı süze yañadan cır, şığır yullarına yañadan qaytqan.
Menä şulay. Ä universam yanında ğına torğan gäcit kioskına qarasañ, monda surät başqaça, sorı töslär, iskergän käğäz, tössez buyaular. Araqı şeşäläre, tämäke tartmaları kebek ber-berse belän yarışmıy gäcit-jurnallar. Anda Qazanda çıqqan nibarı 4-5 gäcit kenä kürenä häm alar arasında da yä uzğan könnärdä, yä uzğan atnalarda çıqqan sannar oçrıy. Alar yaltır-yoltır tışlı, qimmätle jurnal tışındağı külmäksez xatınnar fonında yuğalıp qala.
Şulay itep kibetlärdä xämer simvolikası iñ şäbe, iñ zamançası. Bolay bulğaç şähärdä yäşäwçelär awıl keşelärennän kübräk eçmi mikän, digän fiker başqa kilde. Bilgele, ezlägän keşe taba inde ul, eçkän keşe eçä. Tik yäş buın ğına qızğanıç, alar il häm töbäk geografiäse belän araqı etiketkaları buyınça tanışa. Bügen şähär üzägendä ber genä kibetkä kerep çıqqaç, mondağı xämer dönyasınıñ mullığı, maturlığı şaqqatırdı, ä kitapxanä, balalar kibete tonıq şäwlä bulıp toyıla başladı.
Al'bina Zäynulla, Qazan.

XS
SM
MD
LG