Däwlät Şurasınıñ soñğı utırışında, parlament qarşında Yäşlär palatasın buldıru turında qarar qabul itelde. Berençe utırış yüngä planlaştırılğan, ä xäzerge waqıtta, älege oyışmağa äğzälärne saylaw bara. Yäşlär parlamentın buldıru, yäşlär fikeren xakimiätlärgä işetterü turında, cämäğätçelek wäkilläre arasında, inde küptännän süz yöri ide. Bu ideyanı inde ällä niçä ictimaği oyışma wäkilläre kütärep çığıp, proyekt-täqdimnär belän törle xakimiät oyışmalarına yörde. Soñğılardan bulıp, yäşlär parlamentın buldıru täqdimen «Tatarstan-yaña ğasır» xäräkäten yäşlär qanatı kütärep çıqtı häm parlament räise Färit Möxämmätşinnı andıy oyışmanıñ kiräklegenä ışandıra aldı.
«Berdäm Rusiä» firqäseneñ Tatarstan bülege citäkçese Färit Möxämmätşin, bu yäşlär palatasın buldıru wäğdäsen, saylaw aldı kompaniäse barışında äytep kilde. Xäzer wäğdä ütälergä dä mömkin. Bu eşkä xoquqçılar, deputatlar, yäşlär eşläre ministrlığı cälep itelde. Palatanıñ eş käğäzlärendä äytelgänçä, Räsmi räweştä terkälgän barlıq ictimaği oyışmalarda ciennar ütep, berär wäkil saylanırğa tieş.
Xakimiät firqäseneñ yäşlär qanatı andıy saylaw konferensiäsen ütkärde inde. Başqa oyışmalar da saylawlar ütkärergä ciena. Şul isäptän «Sälät» yäşlär üzäge dä. Älege oyışmanıñ direktorı Wağidullin İldus äfände «Azatlıq radiosı» xäbärçesenä, «Sälät» yäşläreneñ älege oyışmada aktiv eşlärgä isäpläwen xäbär itte. «Yäşlär palatası», zur parlamentqa oxşaş räweştä oyışır, dip uylanıla. Mäsälän anda, ictimaği-säyäsi firqälärdän häm rayon-şäxärlärdän dä wäkillär bulaçaq. Xakimiät firqäse genä tügel, kommunistlar da, başqa säyäsi berläşmälär dä, «Yäşlär palatası»na wäkillären yullıy. Şähär balaları ğına tügel, rayondağı aktiv yegetlär-qızlar da yäşlär palatası äğzäse bula ala. Yäşlär eşläre ministrlığı 25 mayğa qädär, saylaw konferensiäläre turında berketmälär cielaçaq. Annan soñ, yäşlär palatasınıñ berençe utırışın ütkärü planğa kertelgän.
