Accessibility links

якшәмбе, 11 декабрь 2016, Казан вакыты 01:18

Udmurtiädä berençe tapqır Ciñü bäyräme könne parad uzdı


Ciñü köne Rossiä xalqı öçen iñ zur bäyrämnärneñ berse. Anıñ qaytawazı yıllar ütkän sayın tağın da köçleräk yañğırıy. Yıldan yıl suğışnı ütep häm Ciñüne yaqınaytıp könne—töngä yalğap eşlägän keşelärneñ sanı kimegännän kimi bara. Respublikanıñ veterannar oyışması birgän sannarğa qarağanda, bıyıl veterannar isemlegendä 7 meñ 120 suğışçı. Tıl veterannarı respublikada 77 meñ yarım. Veterannarnıñ tormışın respublikanıñ räsmi xökümät orğannarınnan tış meñ yarımnan artıq veterannar oyışmaları ciñeläytergä tırışa. Respublikada maxsus «Ölkännär» programması tözelde. Anda suğış häm tıl veterannarına törle xezmät kürsätü quzdä totıla. Ämmä, bu «Veterannar turında» Zakonda qaralğannıñ 60 protsentı ğına, dip urtaqlaştı respublikanıñ veterannar oyışması räise Petr Russkix. Mäsälän, telefonğa tüläw öçen aqça älegä suğış veterannarına ğına citä, darular belän tä'min itü dä älegä tieşleçä külämdä tügel, fatirlar da yıldan yıl kimräk birelä. Şuşı könnärdä veterannarğa İjaw şähäre administratsiäse yärdäm qulın suzarğa ışandırdı — alarnıñ fatirların tözekländerüdä finans yärdäm kürsätüne planğa kertergä niätlilär. Petr Russkix süzlärençä, suğış qırlarınnan äylänep qaytuçılar yärdämgä moxtac bulmasa, ä menä yäştän ük igen qırlarında, zavod—fabrikalarda mixnät çikkän keşelärneñ pensiäläre dä az, yärdäm dä bik zur tügel. Monda cirle xakimiät orğannarınıñ kiñ küñellelege bik tä urınlı bulır ide. Suğışnı ciñep çığuda tatar xalqınıñ da öleşe bik zur. Berlinnıñ reyxstag binasına berençe bulıp bayraqnı tatar yegete — ölkän serjant Gazetdin Zahitov berketüe äle haman da bäxäslär tudırsa, bügen İjawda yäşäwçe Räisä Minneraxman qızı Soninanıñ rexstax binası stenalarında isemen yazıp qaldıruı bernindi dä bäxäs tudırmıy. 9 may könne İjaw şähäreneñ üzäk mäydanında bağışlap udırılğan tantanada da 80 yäşen tutırıp kilüçe Räisa xanım da bar ide.

Qatı suğışlarda qatnaşıp, berniçä tapqır yaralanıp, medal'lärgä layıq bulğan Şihabetdin abıy Sadıykov ta, ütkän yılnıñ közendä 80 yäşen bilgeläp ütsä dä bu könne öydä utırıp tora almıym, äle Ciñüneñ 60 yıllığın da qarşı alırğa isäbem bar, minem öçen bu bäyräm iñ zur bäyrämnärneñ berse, min anı uzemneñ qanımnı qoyıp yauladım, dide Şihabetdin abıy. Mäñgelek ut yanında suğışta qatnaşqan tatarlar da, tılda tırış xezmät itkän millättäşlärebez dä baytaq ide. Alarnıñ berse — Ğilmulla abıy Şärifullin. Bala ğına bulğan ul suğış barğanda. Ämmä, tormışnıñ açısın da, töçesen dä tatırğa turı kilgän aña. Şuña da bügen kibettän aq ipi satıp alğaç ta, şatlıqtan küz yäşlärem çığa di ul. Mäñgelek ut yanına suğışta wafat bulğannarnı iskä alıp, häykäl qarşına çäçkälär bäyläme salınğaç, mäydanda urnaşqan Milli muzeyda veterannar bu uñaydan asılğan yaña kürgäzmädä buldılar, annan soñ ikençe mäydanğa — parad qararğa aşıqtılar. 9 mayda İjawda berençe tapqır parad oyıştırıldı. Anı suğış veterannarı açtı. Alar arasında bezneñ millättäşlärebez dä bar — Xuca Waxitov, Gabdulxay Gazizov, Mansur Äxmätov Minneğali Bikmuxämätov häm başqalar. Veterannardan soñ xärbi çast'lär tözeleşep ütte. Parad ozaqqa suzılmadı, ämmä xalıq qänäğät qaldı. Äytergä kiräk, suğış yıllarında Udmurtiädä, İjawnıñ üzendä dä bik küp qoral citeşterelgän, bälki kiläçäktä alarnı da kürsätü mömkinlege bulır, bıyılğısı yubileyğa äzerlek kenä, ä bıyılğı bäyräm kiç salyut belän tögällände. Tik anı veterannar tügel, yäşlär tamaşa bularaq küzätte.

Xämidä Ğayfullina, «Azatlıq» radiosı, Udmurtiä.

XS
SM
MD
LG