Accessibility links

Ciñü bäyräme uñayınnan oyıştırılğan çaralar bıyıl Ulyanda üzençälekleräk uzdı


Ölkä üzägendä oyıştırılğan şundıy çarada, mäsälän, 85 yäşlek Fäiz ağa Bahawetdinov üzeneñ yalğış 1941-yılnıñ üktäberendä häläk buluçılar sanına kerüe, 5 yıl elek üzeneñ ülgäne turında Xäter kitabında uquı turında süz tottı. “Äni minem Zaporoj'yeda kümelgänem turında enekäşemä yazğan. Ul näq şul yaqlarda suğışta almannardan üç alu maqsatınnan üzen artıq qıyu totqan, küräseñ: üze häläk bulğan”, - dide veteran. Ä Äbdelxäy ağa Gomärev tılda eşlägän xatın-qız, yäşüsmerlärneñ xezmättäge batırlıqları soldatnıqınnan hiç tä kim tügel, dide.

Çäy östäle artında eçkersez söyläşüdä suğış yılları balaları da üz istälekläre, fikerläre belän büleştelär. Ayıruça tol xatınnar, balalar östenä töşkän faciğäle yazmış turında. Bigräk tä atasız qalğan yätimnärneñ kiçereşläre turındağı süzlär qayberäwlärneñ küzlären dä çılattı. Çığışlarda yañğırağan xalqıbıznıñ elekke häm bügenge äxlağın çağıştırudan suğışnıñ tağın ber yawızlığı - äxlaqi yaqtan çerüneñ suğış näticäse dip añlarlıq ide.

Maynıñ 9 mäktäbe bulğan barlıq awıllarda da matäm mitingları oyıştırıldı. İske Mayna rayonı İske Qızılsu awılında tatar xalqınıñ Räsäy imperiäsen saqlap-yaklap qaluda zur öleş kertkäne turında da süz buldı. Suğış veteranı, 50 yıldan artıq uqıtuçı bulıp eşlägän Zinnät ağa İmamov ayıruça qaharmanlıq kürsätkän millättäşlärebezne sanap ütte häm tatarnıñ SSSR qaharmannarı sanı buyınça 3-yençe urında buluın assızıqladı. Ä Gabdelbär ağa Gabunov, tirän tarixqa küz salıp, “smutnoe vremya” dip atalğan çordan Räsäyne näq tatarnıñ atlı ğäskäre qotqarğanın iskä töşerde. Awıl mitingında qatnaşqan “Tuğan tel” wäkilläre qähär suqqan suğış arqasında ir-at nazı kürmiçä qartayğan qız-äbilär turında da süz tottılar. Qazanda Mintimer Şäymiev başlanğıçı belän dönya kürgän “Qız-äbilär” isemle kitaptan ğibrätle misallar da kiterelde.

“Azatlıq” radiosı, Ayrat İbrahim Sember.

XS
SM
MD
LG