Accessibility links

Кайнар хәбәр

Tatnet: tatmedia.ru Tatarstan mäğlümat çaraların tupladı


Tatarstan mäğlümat çaraların bağuçı “Tatmedia” agentlığı bu atnadan başlap, internetqa çıqtı. Tatmedia.ru adresında urnaşqan bu sayt, berençe çiratta, mäğlümat xezmätkärlärenä üzlärenä faydalanu öçen eşlängän, dip iğlan itelde. Agentlıq, saytlar yasawçı şirkätlär arasında bäyge ütkärep, ciñüçene bilgeläp, şuşı şirkättän internettağı bitlärne yasattı. Tatmedia.ru saytı urıs häm tatar tellärendä eşlängän. Anda agentlıq turında qısqaça mäğlümat, matbuğat oçraşuları turındağı iğlannar, bäygelär häm grantlar turında nigezlämälär belän tanışıp bula.



Saytta Tatarstandağı tele-radiokompaniälärneñ, gäzitlärneñ internet adresları cıyılğan, näşriätlär xaqında mäğlümatlar bar, jurnalistlarnıñ eşenä qağılışlı qanunnardan özeklär täqdim itelä. Xätta, etika digän bülek tä bar, tatarça ul äxlaq, dip tärcemä itelgän. Qızğanıç, äxlaq bülege materialları belän tanışıp bulmadı, ul, häm tağın berniçä bülek, buş bulıp çıqtı.



Saytta ber qızıqlı soraştıru da ütkärelgän. Xucalar «Sezgä bezneñ sayt oşıymı?» digän soraw quyğan. Urıs telle bülektä bu sorawğa 31 keşe cawap birgän, alarnıñ 18-ze saytka xuplaw beldergän, 11-re –«yuq» digän, 2-se «belmim», dip cawap birgän. Tatar telendäge bülektä, bu soraştıruda 58 keşe qatnaşqan. Alar arasında 46 keşe, «äye, bu sayt miña oşıy», dip cawap birgän. 8 keşe - «yuq», 4-se cawap birä almağan. www.tatmedia.ru



Tatar forumnarında tikşerelgän soñğı tema – Çeçnä prezidentınıñ üterelüe buldı. «Tatarskaya gazeta»nıñ konferensiäsendä mäsälän, şul xaqta söyläşü, nindi keşe ul Äxmät Qadırov, kem anı ütertkän, Çeçnädä çınlıqta kem idärä itä, digän sorawlar tiräsendä bardı. Yuldash.com forumında, yäşräk keşelär cıyılğanğa küräder, söyläşülär dä alay uq citdi töstä barmıy, Qadırovnı qızğanalar, anıñ ulı nigä sport kieme belän yöri dip ğäcäplänälär,bezgä dä şartlawlar kilep citmäsen, dip borçılalar.

Axır çiktä, süz mäzäkkä taba borıla. Berse ğäybät söyli: imeşter, Tatarstan Prezidentı Rusiä Prezidentın Saban tuyına çaqırğan. Bäyräm Vladimir Putinnıñ eş planına qarap, 19nçı yüngä bilgelängän ikän. Alay-bolay, Rusiä başlığına höcüm yasarğa uylasalar, bezneñ respublika citäkçesenä dä tiärgä mömkin bit, borçılıp quya «Beräw» digän isem belän yazuçı forumçı. Anıñça, Äxmät Qadırov üterelgäç, Çeçnä xalqı qara qayğığa batqan. Ä Tatarstan Prezidentı, xalıqqa tağı da yaqınraq, çönki küptän eşli, dip yaza ul. Bu forumda yazuçı başqa yäşlär dä, şul tema tiräsendä yarım şayan, yarım citdi itep citäkçelär turında fikerläre belän büleşä. www.yuldash.com/forum

Bikä Timerova.
XS
SM
MD
LG