Accessibility links

шимбә, 3 декабрь 2016, Казан вакыты 01:34

Tatenergo berläşmäse yaña binağa küçte


Yañadan salqın könnär qaytqaç, cılılıqnıñ qädere arttı. Şimbä könne ütkän ğadi genä ber çara zur waqiğa cämäğätçelek tarafınnan zur waqiğa bularaq qabul itelde. Tatenergo oyışması yaña binağa küçte. Kamal teatrı qarşındağı Qaban küle yanında zamança, matur bina xäzer Tatarstan başqalasın bizäp tora. Bu binada xisaplaw üzäge, idärä texnologiäse cihazları da urnaşqan. Bu çarada Tatarstan prezidentı Mintimer Şäymiev tä qatnaştı. Ul Tatenergo berläşmäseneñ toraq reformasında nindi ähämiätle buluın äytte. Şuşı kompaniädä citeşterelgän cılılıq energiäseneñ üzqimmäte ike tapqır oçsızraq ikän. Dimäk, toraqlarnı asraw bäyäläre bik qimmät bulmasın öçen, energetiklar zamança eşlärgä tieş. 17 meñ keşe eşlägän 9 cılılıq elektrostansiäse, Kama gidroelektrostansiäse, Energosbıt oyışması häm cılılıq çeltäre kergän Tatenergo xäzer Rusiädä iñ aldınğı şirkätlärneñ berse. Anı citäkçese - İlşat Färdiev ildäge iñ uñışlı citäkçelär ala torğan yıl direktorı isemenä layıq bulğan. Soñğı waqıtta Tatenergo, İlşat Färdiev digän süzlär respublikanıñ vizit kartoçkasına äwerelä başladı. Aqtanış rayonınıñ Änäk awılında tuıp üskän bu citäkçe üze xalıq aldında çığışlar yasap, mäğlümat taratıp yörmäsä dä, aña iğtibar bik zur. Küptän tügel İlşat Färdiev Kamal teatrınıñ İñ yaxşı tatar p'yesası yarışına matdi yärdäm itep, üzeneñ milli mädäniätkä iğtibarlı buluın kürsätte. Tatenergonıñ elekke zur binası tözelep yatuçı milli universitetnıñ ikençe binası bulaçaq, dimäk energetiklar bu eşkä dä üz öleşlären kertä.

Şunısın da äytergä kiräk, şuşı könnärdä Tatenergo şirkäte general' direktorınıñ finans mäs’äläläre buyınça urınbasarı Gölsinä Miñnexanova Rusiäneñ iñ yaxşı menedjerı digän isem häm 6 kilogramm awırlıqta bronza sın- statuetka alıp qayttı. Oyışmanıñ finans häm iqtisat ölkäsendäge kürsätkeçläre başqalardan ayırılıp tora ikän. Gölsinä Miñnexanova Qırğızstanda tuıp üsep, Qazanda uqığan. Soñğı yıllarda ul Älmät şähär xakimiätendä, annarı Tatenergoda İlşat Färdievneñ ışanıçlı urınbasarı bulıp eşli. Xatın-qızğa mondıy awır eşlär tapşıru ğäcäpländerä, çönki respublikanıñ iñ möhim tarmağınıñ finans eşlären alıp baru bahadir köçen taläp itä. Şunısı qızıq, soñğı ike yılda Gölsinä Miñnexanova östenä tağın ike urınbasar yögen - iqtisat buyınça häm energosbıt, kontrol' häm reviziä yünäleşlären dä birgännär. Färdievneñ öç ir urınbasarı urında xäzer ber xatın eşli.

Rimzil Wäli

XS
SM
MD
LG