Accessibility links

дүшәмбе, 5 декабрь 2016, Казан вакыты 15:39

Hindstan kommunistları yaña xökümätkä kermäsä dä, anı xuplarğa wäğdä itte – Sonia Gandi premier-ministr bulaçaq


Hindstan kommunistları yaña xökümätkä kerüdän baş tartsalar da, saylawlarda ciñep çıqqan Kongress partiäse citäkçese Sonia Gandinı xuplayaçağın belderde. Şulay itep, çärşämbedä Sonia Gandi premierlıqqa ant birer dip kötelä. Xakimiättäge bilgesezlek sürätendä düşämbedä qimmätle qäğäz bazarında aksiälär 15 protsentqa töşte.

Şulay itep, 13 yıl elek üterelgän premier-ministr Radjiv Gandinıñ xatını, çığışı belän İtaliädän bulğan Sonia Gandi dönyada iñ zur demokratik il sanalğan Hindstanıñ yaña premier-ministrı bulaçaq. Çärşämbedä Sonia xanım premierlıqqa ant totır dip kötelä. Uzğan atna tämamlanğan saylawlarda anıñ Kongress partiäse kötmägändä ciñügä ireşte. Läkin yaña xökümät tözü öçen partiäneñ üz tawışları citmi, Sonia xanım kommunistlar xuplawına moxtac ide. Düşämbedä ilneñ iñ ere kommunistlar partiäse citäkçese Somnath Chatterjee, kommunistlar yaña xökümätkä kermäyäçäk, ämmä Sonia Gandinı xuplarğa äzer dip belderde:

Audio (Somnath Chatterjee)

Koalitsion xökümätkä kermiçä genä anı çittän torıp xuplaw Hindstan öçen öçen ğädäti küreneş. Menä xäzer dä, kommunistlar Kongressnıñ iqtisadi säyäsätenä, qayber xosusıylaştıru plannarına qarşı bulsalar da, koalitsion xökümätne xuplarğa äzer. Xakimiättäge Millätçelär, Bharatia Janata partiäseneñ saylawlarda ciñelüe häm yaña xökümät tiräsendäge bilgesezlek sürätendä, düşämbedä ilneñ qimmätle qäğäz bazarında töşenkelek küzätelde. Bombay indeksı kisäk kenä 10 protsentqa töşkännän soñ satularnı xättä tuqtatırğa buldılar. İke säğättän satular yañartıldı, ämmä yuğaltular 15 protsetqa citte. Kongress partiäseneñ yuğarı räsmie Manmohan Singh, yaña xökümät üseş, säwdä, totrıqlı bazar säyäsäte aılp baraçaq digän belderü yasağannan soñ ğına, birjalar tınıçlana başladı. Singh Hindstanda 1991 yılda başlağan reformalarnıñ atası sanala. Belgeçlär fikerençä, yaña xökümät iqtisadnı zamanlaştıru yulınnan baruın däwam itäçäk. Ä menä säyäsät, bigräk tä kürşe Paqstan belän mönäsäbätlärgä kilgändä, älegä sorawlar qala. Uzğan atnada Paqstan tışğı eşlär ministrı Xörşid Mäxmüd Kasuri, Hindstannıñ yaña xökümäten Kaşmir mäsäläsendä söyläşülärne däwam itergä çaqırdı:

Audio (Xörşid Mäxmüd Kasuri)

"Paqstan, Hindstannıñ yaña xökümäte bulğan bäxäslärne, şul isäptän Kaşmir mäsäläsen xäl itügä citdi alınır dip ömetlänä."

Ämmä qayber küzätüçelär fikerençä, Hindstannıñ yaña xökümäten bu ölkädä awırlıqlar kötä. Hindu millätçeläre xakimiättän kitsä dä alarnıñ köçle basımı qala birä. Sonia Gandiğa İslamabad belän söyläşülär alıp baru, Hindstan xalqına taşlamağa baru kiräklegen añlatu ciñel bulmayaçaq.

Ali Gilmi, Praga
XS
SM
MD
LG