Accessibility links

якшәмбе, 4 декабрь 2016, Казан вакыты 13:10

Ğiraq İdarä Şurası başlığı İzzedin Sälim üterelde


Düşämbe irtäsendä Bağdadta Ğiraq İdarä Şurasınıñ citäkçese İzzedin Sälim üterelde. Xakimiätne ğiraqlılarğa tapşıruğa 6 atna waqıt qaıp barğanda Ğiraqnıñ törle şähärlärendä ğisyançılar kütäreleşe häm bügenge höcüm yaña Ğiraq xökümäteneñ nindi qıyınlıqlar aldında toruın, häm Amerikannan belän xezmättäşlek itüçe dip qaralğannarğa nindi qurqınıçlar yanawın kürsätä. Ğiraq tışqı eşlär ministrı Xöşyär Zerabi Sälimneñ üterelüe xakimiätne ğiraqlılarğa tapşıru eşenä tä''sir itmiäçäk dide.

Düşämbe irtäsendä Bağdadta maşinağa quyılğan bomba şartlawdan Ğiraq İdarä Şurası başlığı İzzedin Sälim, tağın berniçä ğiraqlı häm 2 amerikan soldatı hälak buldı. Kilgän xäbärlärgä qarağanda Sälimne İdarä binasına alıp kilgän maşinalar törkemendä barlığı 5 maşina bulğan. Ul maşinalar bina yanındağı Yäşel Zona dip ataluçı urınğa kerer aldınnnan tikşerü qapqası yanına tuqtağan. Amerikan xärbiläre saqlağan qapqa yanında tikşerü ütkändä alar yanında başqa ber maşina kilep tuqtağan häm andağı intixar terrorçı bombanı şartlatqan. AQŞ citäkçelegendäge koalitsiä idaräse wäkile Sälimneñ ülemen raslap älege waqıyğa turında bolay dide:

AUDİO: Bez bombanı intixarçı şartlatqan, anı şartlatuçı terrorçı bulğan häm şartlaw näticäsendä ul da ülgän dip isäplibez.

Älege waqıyğa Ğiraqta xakimiätneñ AQŞ citäkçelendäge koalitsiädän Ğiraqnıñ küçeş çorı xökümätenä tapşırıluına 6 atna ğına qalıp barğanda ildäge wäzğiätne, iminlekneñ ni xäldä buluın açıq sürätli. Sälim Ğiraqqa koalitsiä köçläre kergännän soñ üterelgän iñ yuğarı däräcädäge räsmi ide. Amerikannar oyıştırğan İdarä şurası äğzaları şuranı almaşınıp citäkli. Häm Sälimneñ üterelüe näq anıñ şuranı citäklägän çorına turı kilde. Uzğan yılnıñ sintäber ayında şuranıñ başqa ber äğzası, şuradağı 3 xatın-qıznıñ berse Aquila äl-Häşimin atıp üterelde.

Kübesençä İzzedin Sälim iseme belän tanılsa da anıñ çın iseme Abdel Zahra Otman Möxämmät. Ul Şurada şiğilarnı wäkillek itä ide häm Basradağı Däwa xäräkäte citäkçese dä ite. Yazuçı, fälsäfäçe häm berniçä jurnalda möxärrir bularaq tanılğan Sälim suğışçan şiği din ähele Muqtada äs-Sadr ğisyançıları belän söyläşülärdä aradaşçı da buldı.

Bu könnärdä İordaniädäge iqtisadıy konferensiädä qatnaşuçı Ğiraqnıñ waqıtlı tışqı eşlär ministrı Xöşiär Zebari Sälimneñ üterelüe 30-nçı iyüngä bilgelängän suverenlıqnı ğiraqlılarğa tapşıru eşenä tä''sir itmiäçäk dip belderde. Anıñ äytüençä, bügenge höcüm Ğiraq İdarä şurasınıñ ähämiäten açıq kürsätä.

AUDİO: Bu İdarä Şurasın näticäsez, häm Ğiraq xalqın wäkillek itmi dip kire qağuçılarnıñ barısına da terror höcümnäreneñ häm bu protseslarğa qomaçawlarğa teläwçe demokratiägä qarşı köçlärneñ töp hädäf itep Şura äğzaların saylawın kürsätä. Ämma bez qurıqmayaçaqbız häm yaña Ğiraq yulınnan barunı däwam itäçäkbez.

AQŞ citäkçelegendäge koalitsiägä qarşı ğisyan kütärüçelär şura äğzaların Amerikan okupatsiäse belän xezmättäşlek itüdä ğäyepli.

Sälimneñ ülemennän soñ İdarä Şurası citäkçelege şuranıñ başqa ber äğzası Ğazi Maşal Äcil äl-Yawir qulına küçte. äl-Yawir da bilgelängän yuldan taypışılış bulmıyaq dip belderde.

Ğiraqnıñ xakimiätne üz qulına alıp saylawlarğa qädär idarä itäçäk küçeş çorı xökümäten tözü eşenä kilgändä, yäkşämbe könne Ğiraq tışqı eşlär ministrı Zebari ul xökümätneñ niçek tözeläçäge turında qaraq bu ay axırına äzer bulaçaq dide. Anıñ äytüençä yaña xökümättä prezident, anıñ ike urınbasarı, premyer-minsitr häm 26 ministr bulaçaq. Ul şäxeslärne bilgelägändä mäs''äläneñ texnokratik häm säyäsi yağınnan tış alarnıñ ni däräcädä namuslı buluı da isäpkä alınaçaq. Zebari Reuters xäbärçeseneñ küçeş çorı prezidentı ildä küpçelekne täşkil itüçe şığıylar wäkile bulaçaqmı digän sorawına älegä bilgele tügel, ay axırına ul turıda qaraq qabul iteläçäk dip cawap birgän.

Naif Aqmal, Praga.
XS
SM
MD
LG