Accessibility links

дүшәмбе, 5 декабрь 2016, Казан вакыты 21:37

19 may – Tatarstan Matbuğatı köne


19 may könne Tatarstanğa räsmi vizit belän Yaroslavl’ ölkäse gubernatorı Anatoliy Lisitsin kilde. Şunısı qızıq, ul Qazanğa başqa töbäk citäkçelärennän ayırmalı bularaq, maxsus oçqıçta tügel, ä köymädä kilep töşte. Başqalanıñ Yılğa portında gubernatornı respublika prezidentı Mintimer Şäymiev qarşı aldı. Älege räsmi säfärneñ töp maqsatı – Qazannıñ meñyıllıqqa äzerlänüe belän tanışu. Çönki 2010 yılda Yaroslavl’ dä üzeneñ 1000yıllıq yubileyın bäyräm itärgä cıyına ikän. Anatoliy Lisitsin Mintimer Şäymiev belän bergä Qazanda çärşämbe könne uzğan matbuğat bäyrämendä dä qatnaştı, respublikanıñ massaküläm mäğlümät çaraları belän tanıştı.

Ğomumän, 19 mayda Tatarstanda bulğan küp kenä waqiğalar häm çaralar matbuğat belän bäyle. Çönki bu könne respublika matbuğatı köne bäyräm itelä. Şuşı uñaydan Tatarstannıñ premyer-ministrı urınbasarı Zilä Wälievanıñ qotlawı dönya kürde. Ul anda massaküläm mäğlümät çaralarınıñ xäzerge waqıtta ğayät zur rolen bilgeläp ütep, jurnalistlarnı, matbuğat xezmätkärlären häm uquçılarnı bäyräm belän qotlağan. Tatarstanda matbuğat çaraları bik küp bulğanğamı, ällä inde Tatmedia agentlığınıñ tırışlığımı, bäyräm Qazanda bıyıl bik zurlap ütkärelde. İnde xäbär itkänebezçä, respublikanıñ Tatmedia agentlığı 19 may könenä bağışlap Rusiä töbäklärennän häm Tatarstannıñ törle rayon, şähärlärennän kilgän jurnalistlar öçen Media-forum oyıştırdı. Älege forum qısalarında tanılğan jurnalistlar belän qızıqlı oçraşular, master-klasslar, jurnalistlarnıñ ber-berse belän aralaşular, möhim söyläşülär ütte. Çärşämbe könne isä Media-forumğa cıyılğan qunaqlar Tatarstannıñ Däwlät Şurasında uzğan Tügäräk östäl utırışında qatnaştı. Ul parlamentnıñ häm mäğlümät çaralarınıñ xezmättäşlek mäs’älälärenä bağışlandı. Tügäräk östälneñ utırışında Däwlät Şurası räise Färit Möxämmätşin, Zilä Wälieva, Jurnalistlar berlege räise Rimma Ratnikova, Tatmedia agentlığı citäkçese Marat Moratov qatnaştılar.

Şul uq 19 may könne kiçen Qazannıñ Piramida küñel açu üzägendä Tatarstan matbuğatı könenä bağışlanğan tantanalı kiçä uzdı. Anda respublikanı jurnalistlarınıñ Bällür qäläm isemle bäygesendä ciñüçelärneñ isemnären atap, alarnı büläkläw uzdı. Çärşämbe könne tağın ber çara – başqalanıñ üzäk Bauman uramında oyıştırılğan massaküläm mäğlümät çaralarınıñ uramı uzdı. Älege bäyräm dä Tatarstan matbuğatı köne uñayınnan uzdırıldı. Älege qızıqlı çarada Azatlıq radiosınıñ Qazan byurosı da qatnaştı. Bez dä üzebezneñ tıñlawçılarıbız belän oçraştıq, alar belän yaqınnanraq tanıştıq, üzebezneñ keçkenä genä bulsa da istälekle büläklärebezne tapşırdıq. Äytergä kiräk, respublikada bezne tıñlawçı keşelär az tügel. Şunlıqtan, inde işetkänegezçä, Bauman uramında da bezneñ yanğa kilüçelär küp buldı. Mömkinçelektän faydalanıp bez alarnıñ tormışları xaqında soraştıq, fikerläre belän qızıqsındıq. Älbättä, bezne tıñlawçılarıbıznıñ Azatlıq radiosı turında uy-fikerläre dä bitaraf qaldırmadı. Ayıruça, alarnıñ radiobızğa, anda eşläwçe jurnalistlarğa täqdimnäre häm kiñäşläre qızıqlı buldı.

Gölnaz İlgizär

XS
SM
MD
LG