Accessibility links

шимбә, 3 декабрь 2016, Казан вакыты 12:45

Bötendönya tatar yäşlär forumına äzerlek eşläre başlandı


Bötendönya Tatar kongressı sıman Tatar yäşlär cıyının uzdıru turında täqdimnär, milli xäräkät başlağannan birle, äytelep kilde. Ämma Bötendönya Tatar yäşlär kongressınıñ uzdırılğanı yuq ide. İnde bu cäydä älege çara nihayät ütkäreler dip kötelä. Tatar Kongressınıñ Başqarma komitetında, pänceşämbe könne bulğan cuyılışta şuşı yäşlär cıyınına äzerlek mäs’äläläre tikşerelde. Bötendönya tatar yäşläre kongressın 24-28 iyündä häm kongress tügel, ä forum digän isem belän uzdıru planlaştırıla. Ütkärü urını – Qazan, delegatlar sanı - 700. Forumnıñ programması ğädäti plenar utırış häm seksiälärdän genä tormıy. 24 iyündä mäsälän tatar zıyalıları belän oçraşu qaralğan, 25 yündä isä Milli mäğärif, mädäniät, islam, eşmäkärlek, kommunikatsiä çaraları kebek seksiäneñ eşläwe kötelä. Annan soñ, könneñ ikençe yartısında forumnıñ tantanalı açılışı, seksiälär eşlärenä nigezlänep qararlar qabul itü, axırdan konsert qaraw qaralğan. Forumnıñ öçençe eş könendä, 26 yündä, anda qatnaşuçılar Mari El respublikasında uzdırıla torğan federal Saban tuyına baraçaq. Ä 27nçe iyündä Bolğarğa baru, forumnıñ yabılu tantanası, tatarça KVN uyınnarı, konsert planğa kertelgän.

Bu äle forumnı ütkärü proyektları ğına. Plannar üzgärergä dä mömkin.

Xäzerge waqıtta forumda nindi mäs’älälärne xäl itü, nindi problemalarnı kütärü turında uylanalar. Pänceşämbe könne, Kongress binasında, Tatarstannıñ rayonnarınnan kilgän qayber yäşlär oyışmaları citäkçeläre forumnıñ eçtälege turında fiker alıştı.

Berençe mäs’älä itep, yäşlärneñ assimilätsiäläwe, urıs yäki başqa il möhitendä erep yuğaluı telgä alındı. Şähär yäşläreneñ genä tügel, awıl balalarınıñ moñ-zarlarına da iğtibar birü kiräklegenä basıym yasaldı. Yäşlärne şulay uq eşsezlek, yuğarı belem alu qıyınlığı, yäş ğailälärne toraq belän tä’min itü kebek problemalar borçıy.

Älege häm başqa küp sanlı mäs’älälär, forumnıñ ayırım seksiälärendä qaralır dip uylanıla. Forum delegatları cirle oyışmalarda, küpçelek tawış belän saylanırğa tieş. Tatarstannan yäşlärenä 300 urın, Rusiä häm çit ildäge tatar yegetlärenä häm qızlarına 250 urın qaralğan. Oyıştıruçılar, delegatlarnı saylaw eşlären iyün başlarına qädär beterergä kiñäş itä.

Bikä Timerova.

XS
SM
MD
LG