Accessibility links

шимбә, 3 декабрь 2016, Казан вакыты 03:34

“Säxnä” jurnalı turında Luara Şakircan söyli


Çirattağı şimbä matbuğat küzätüendä bez sezne «Säxnä» jurnalı belän tanıştırırbız.«Säxnä » jurnalı ul äle yaña jurnal.Aña äle ike genä yıl.Jurnalnı 2002 yılda Tatarstan Respublikası «Tatmedia» massaküläm kommunikatsiä agentlığı ğämälgä quya. «Säxnä»jurnalı Mädäniät ministrlığınıñ mäğlümat yärdäme belän Zinnur Xösniar citäkçelegendäge täcribäle icat törkeme çığara.”Säxnä”ne çığaruçılar “Salawat küpere”jurnalı, “Tahir Zöhrä”gäzite, , milli mäs'älälär, din häm tärbiä turında kitaplar çığaru belän tanılğan. Anıñ, “Salawat küpere” jurnalı belän urtaq redaksiäse, Möştäri uramında Tatarstan Yazuçılar berlege binasında urnaşqan .Jurnalnıñ epigrafı itep «Säxnä- wäğdä,säxnä –iman.Annan başqa yäşäw yaman»-dip alınğan. Xäyer, mädäniät xezmätkärläre häm tamaşaçı öçen «Säxnä» açıq. Mikrofon aldında Tatarstannıñ atqazanğan sänğät eşleklese, Ğ.Kamal teatrınıñ muzey citäkçese Luara xanım Şakircan. Luara xanım, «Säxnä» jurnalı ul nindi jurnal, kemnär turında yazıla bu jurnalda, nindi problemalar yaqtırtıla, şular turında söyläp kitegez äle, “Säxnä”jurnalı ul, ike ayğa ber san çığa torğan jurnal.Anıñ qızıq üzençälege bar:anıñ ber yartısı teatr dönyasına, ä ikençe yartısı estradağa bağışlana. Jurnal şunsı belän ähämiätkä iä -köndälek matbuğattan ayırmalı bularaq , yubileylar uñayınnan ğına tügel, biredä säxnägä berençe adımnarın atlağan yäp-yäş artistlarıbız turında da , yäşlär teatrı xaqında da , täfsilläp yazğan ,küp mäğlümat birelgän yazmalar basıla. Häm , älbättä, tanılğan, yaratqan artistlarıbıznıñ icatı da yaqtırtıla. Törle premyeralar turında ,Qazannan yıraqta bulğan Älmät, Minzälä, Çallı töbäklärendäge teatrlarıbıznıñ xäl-äxväle , icatı belän dä tanıştırıp, söyläp, yazıp tora.Sänğatebez ölkäsendä tuğan problemalar turında da mäqälälär basıla.”Mälikä Basıyr:Luara xanım,tıñlawçılarğa jurnalnıñ soñğı sanı qızıqlıraq bulır.Anda närsälär bar ikän, söyläp kitik äle. Jurnalnıñ teatrğa bağışlanğan tışlıq bitendä yaratqan artistıbız Rusiäneñ häm Tatarstannıñ xalıq artistı, Tuqay büläge lawreatı Rawil Şäräfi räseme.Kölderüçe, yaratqan artistıbız citdi, beraz arığan qaraş belän uylanıp töşkänRawil Şäräfi turında Waqif Nuriev yazması bik qızıqlı häm artist tormışı xalqınıñ qayber yaña yaqların da uquçığa citkeräJurnalnıñ berençe bitendä T.Miñnullinnıñ “P'yesa niçek yazıla?”,-digän keçkenä yazmasında, “P'yesa öçen syujet tulıp yata, anı ezlise dä yuq, tik Grek mifındağı kebek“altın alma”taşlap qına da tabırğa bula”- di avtor.Tağın jurnalnıñ bu sanında, Marsel' Galievnıñ mäşhür , legendar biyüçe Rudol'f Nurievqa bağışlanğan säxifäse bar. Anda ul R.Nuriev nıñ Parijda çıqqan kitabınnan özemtälär, özeklär birä.“Bez-Nuriewlar näsele-tatardan çıqqanbız, dimäk,min möselman ömmätennän bulam, ”-dip kitabında yazıp qaldırğan R.Nurievnıñ süzläre kiterelä jurnalda. Avtornıñ yazmasında tup-turı äytelmäsä dä, tatar xalqınıñ talantlı balaları ni öçender çit, yat cirlärgä kitärgä mäcbür, soñ“,- digän açınu çağıla jurnalda.Şunı da äytep kitik äle. R. Nuriev isemendäge klassik balet festivale 1987 yıldan tatar opera häm balet teatrı tarafınnan oyıştırıla. Ә 1993 yıldan Rudol'f Nuriev isemendä yıl sayın Qazanda maynıñ şuşı atnalarında ütkärelä torğan ide. Bıyıl M. Cälil isemendäge tatar opera häm balet teatrı binasın Qazannıñ meñyıllığına citeşterü öçen , tözekländerü eşlärenä kereşü säbäple ,festival' oyıştırılmadı. Xalıq bu festival'ne inde sağınıp ta ölgerde, axrısı. Jurnalnıñ bu sanında ädip Ayaz Ğiläcev Räfqat Bikçäntäev turındağı yazmasın bolay dip tämamlıy:“Kiläçäk buın rejisserları häm artistlarına da milli teatrnı milli itep yäşätü serlären añardan qayta-qayta öyränergä turı kiläçäk äle”Küp tamaşaçılarğa bilgele şunsı da, Räfqat Bikçäntäyevneñ ulı Färit Bikçäntäev bügenge köndä Ğ.Kamal isemendäge tatar däwlät akademiä teatrınıñ baş rejisserı.Estrada turında jurnalnıñ baş möxärrire Zinnur Xösniärneñ ”Tatarstan –yaña ğasır ” teleradiokompaniäse general' direktorı urınbasarı Miläwşä Aytuğanova belän äñgämäse urnaştırılğan.Anda Aytuğanovanıñ xıyalları: täwlek buyına eşli torğan tatar telendä ayırım, rus telendä ayırım kanal buldıru ikänen belergä bula”.Häm Tatarstan Däwlät Şurası deputatı Razil Wäliev belän Nursiä Şäydullinanıñ äñgämäse “Sağındıra moñlı cır ”dip atala. Yazma aşa Razil Wälievneñ:“Tatarda “köy” digän süzneñ mäğnäse tirän, ul muzıkanı ğına tügel, köyle, caylı digänne dä añlata. Köy- ul ruxi dönyañdağı garmoniä”,- digän fikerläre belän tanışırğa bula.Xörmätle radio tıñlawçılar!Çirattağı şimbä matbuğat küzätüen şuşınıñ belän tämamlıybız. Sez ”Säxnä” jurnalı turında Ğ.Kamal teatrınıñ muzey citäkçese Luara xanım Şakircannı tıñladığız. Tapşırunı alıp bardı Mälikä Basıyr, Qazan.

XS
SM
MD
LG