Accessibility links

Кайнар хәбәр

Ğäräp Ligası ğäräp illärendä säyäsi reformalar ütkärü programmasın qabul itte


Yäkşämbe könne Ğäräp Ligası ğäräp illärendä säyäsi reformalar ütkärü häm xalıqara terrorçılıqqa qarşı köräş turında programma qabul itte. Bu plan tunis başqalasında 2 kön däwam itkän oçraşudan soñ iğlan itelde. Bu ayda AQŞ däwlät sekretare Colin Powell ğäräp illäre citäkçelären üz illärendä demokratik häm iqtisadıy reformalar ütkärü öçen bergäläp eşlärgä öndägän ide. Ämma Tunis tışqı eşlär ministrı Xäbib bin Yaxya bu plan AQŞ basımınıñ näticäse tügel dide. 13 öleştän torğan bu programma 22 ğäräp ilen üz eçenä alğan älege oyışmanıñ reformalar ütkärü turındağı berençe urtaq dokumentı. Ğäräp Ligası qayber ğäräp illäreneñ tışqı eşlär ministrlarına bu programmanı 10-nçı yündä ütäçäk Sigezlek oçraşuına täqdim itärgä quştı. Köçle sänäğätkä iä illärne berläştergän Sigezlekneñ ul oçraşuına Bähräin, Yämän, Mısır, İordaniä häm Söğüd Ğäräpstanı da çaqırıla. AQŞ xökümäte yündä ütäçäk Sigezlek oçraşuın Kiñräk Yaqın Könçığış İnitsiativasın başlaw urınına äwerelüen teli. Bu initsiativa Ğäräp dönyasında säyäsi, iqtisadıy reformalarnı yaqlaw öçen AQŞ, Sigezlek, Yewropa Berlege häm NATO arasında xezmättäşlek buldıruna maqsat itä. Ğäräp Ligası İzrail''neñ Fälestin cirlärendäge xärbi ğämällären ğäyeplägän belderü dä qabul itte. Ğäräp Ligasınıñ general'' sekretare Amr Mussa Ğäräp Ligası dönyanıñ İzrail''-Fälestin nizağına xalıqara prinsiplar nigeznedä qarawın teli dide:

AUDİO: Bez ğäräp dönyasını citäkçeläre barlıq xalıqara taraflarnıñ ğäräp-izrail'' nizağına qarata barlıq xalıqara xoquq prinsipları häm BMO rezolütsiäläre nigezendä mönäsäbät kürsätüen telibez. Ğäräp sammitına häm Yaqın Könçığışta tınıçlıq urnaştıru turındağı xalıqara yaqlanğan planğa kileşle räweştä, bernindi çığarmasız, bu prinsiplar älege nizağqa qarata härtörle rezolütsiäneñ nigeze bulırğa tieş.

Baştaraq oçraşuda Ğäräp illäreneñ tışqı eşlär ministrları Ğiraqtağı wäzğiät turında da söyläşte.

Naif Aqmal, Praga.
XS
SM
MD
LG