Accessibility links

Кайнар хәбәр

F.Möxämmätşin Strasburgqa kitte


Fransiäneñ Strasburg şähärendä cirle häm töbäk xakimiätläreneñ Yevropa külämendäge kongressı sişämbe könne açılaçaq. Tatarstan Däwlät Sovetı räise Färit Möxämmätşin menä şuşı kongressta qatnaşır öçen säfärgä kitte. Tatarstan, Başqortstan häm başqa respublikalar yaqın arada cirle üzidarälär reformasına kereşep, wäkälätlärneñ häm vazıyfalarnıñ şaqtıy öleşen şähär, rayon, awıl däräcäsendäge xakimiätlärgä tapşırırğa cıyına. Bu respublikanıñ üz xakimiäten beraz kimetü, urınnardağı xalıqnıñ mömkinleklären häm cawaplılığın arttıru şoma ğına barmıy. Bigräk tä - säyäsät ölkäsendä. Yevropa Sovetı qarşındağı şuşı oyışmanıñ eşendä 2000 yıldan birle qatnaşqan Färit Möxämmätşin kongressta çığış yasarğa cıyına.
Ğilmi fiker alışular köne
Düşämbe könne Däwlät xezmätkärläre akademiäseneñ Qazan bülegendä Etnosotsiologiä seminarı eşen däwam itte. Bu könne Peterburgtan kilgän Eduard Panarin citäklägän seminarda tatar-başqort mönäsäbätläre, qırım tatarları, Dnestr yanındağı respublika, Yugoslaviä xällären centekläp öyrändelär. Sişämbe könne älege çinovniklar mäktäbendä tatar milli xäräkätläre turında söyläşäçäklär. Seminarda Tatarstannıñ ğına tügel, başqa töbäklärdän da wäkillär qatnaşa. Bezneñ xäbärçelärebez bulaçaq häm xäzerge çinovniklarnıñ milli imäs’älälärne niqädär tiränten belüen öyränü öçen bu çarada qatnaşırğa cıyına.
Teoriä yağı niçekter, ä menä praktik yaqtan Tatarstan häm Başqortstan mönäsäbätlären belü, pozitsiälärne yaqınaytu öçen bik uñaylı waqıt citte. İke respublika arasındağı mönäsäbätlärneñ yaxşıruın, tatar belän başqortnıñ bergäläşep millät bularaq kötärelen teläüçelär Tatarstanda küpçelekne täşkil itä.
Ğomumän äytkändä, bu düşämbedä Qazanda ğilemle, başlı keşelär, din, millät, säyäsät turında bersennän-berse möhim söyläşülär alıp bardı. Bu atnada tatar xalqınıñ Milli mäclese isemle ictimaği oyışma milli mäğärif turında bik ähämiätle konferensiä ütkärä.
Rimzil Wäli, Qazan.
XS
SM
MD
LG