Accessibility links

дүшәмбе, 5 декабрь 2016, Казан вакыты 17:32

Cannes festivaleneñ töp büläge - prezident Bushnı tänqitlägän filmğa


Quşma Ştatlarda xäzer suğışqa qarşı xäräkät elekkeçä kiñ cäyelmäsä dä, prezident Bushnıñ säyäsätenä qarşılıq başqa törle formalar ala, xörmätle tıñlawçılar. Äle genä tämamlanğan Cannes film festivalendä andağı iñ yuğarı büläkkä - "Altın palma botağı"na Bushlar ğailäsenä bağışlanğan häm xäzerge amerikan prezidentın tänqitläp sürätlägän film layıqlı dip tabıldı.

"Fahrenheit 9/11" dip atalğan şuşı film iğtibarnı äle Cannes festivalenä qatnaşu aldınnan uq cälep itkän ide. Anda Quşma Ştatlarnıñ xäzerge respublikan prezidentı Bushqa qarata şaqtıy tänqiti süzlär häm sürätlär bulu säbäple, film töşerüne finanslağan mäğlüm "Walt Disney" studiäse anı kiñ cämäğätçelekkä kürsätüdän baş tarttı. Studio citäkçelege, film säyäsi maqsatlardan çığıp töşerelgän, bıyıl köz ütäçäk prezident saylawları aldınnan anı kürsätü urınlı bulmas, bu qayber tamaşaçılarnıñ xislären räncetä ala digän fikerdä toruın beldergän ide. Michael Moore töşergän şuşı dokumental'' äsärdä Bushqa qarşı çınnan da citdi ğäyepläwlär äytelä, misal öçen, 2000-nçe yılğı saylawlarnı ul xärämläşep ottı, anıñ ğailäse Osama ben Laden näsele belän säwdä eşläre alıp barğan digän fikerlär äytelä. Moñardan tış film Bush xakimiateneñ Ğiraq suğışın başlawın, 11-nçe sintäbr waqiğälärennän soñ alıp barğan säyäsäten tänqitli. Moore Disney citäkçelegen tsenzura urnaştıruda ğäyepläde, alar üzläreneñ Floridada urnaşqan küñel açu parkın salımnardan qotqarunı ğına qayğırta dip belderde. Mäğlüm ki, şul ştatnıñ gubernatorı bulıp prezident Bushnıñ enese Jeb tora. Şuşı nizaqta Moore xäzer şaqtıy zur xalıqara yaqlaw qazana - Cannes festivaleneñ iñ yuğarı büläge anıñ filmına dönyaküläm tanılunı tağın da arttıra ğına.

Audio, Quentin Tarantino

Cannes festivale jürieneñ bıyılğı räise Quentin Tarantino "Altın palma botağı"n "Fahrenheit 9/11" filmına birelüen iğlan itä. Tarantino süzlärenä qarağanda, jürineñ qararı hiçkenä dä säyäsätkä bäylänmägän, Moore çınnan da "şäp film" töşergän. Büläkne qabul itkändä Michael Moore anıñ çınnan da xälitkeç mizgeldä kilüen qabatladı.

Audio, Michael Moore

"Soñğı atnalar çınnan da bik qatlawlı ide, çönki bez Amerikadağı kürsätüne oyıştıraçaq şirkätne cuyğan idek. Läkin min zur şatlıq belän bezneñ xäzer andıy şirkätebezneñ Albaniädä buluın iğlan itä alam. Şulay itep, bu filmnı xäzer dönyanıñ barı tik ber ilennän başqa bar poçmaqlarında da qarıy alaçaqlar", di "Fahrenheit 9/11"nı töşergän häm şul filmı belän Cannes festivalendä ciñgän Michael Moore. Aq yortnıñ moña mönäsäbäte bitaraf ide diärgä bula, anıñ matbuğat wäkile Suzy DeFrancis "FrancePress" agentlığına, Quşma Ştatlar böyek ber il, çönki anda ireklek bar häm härkem ni telägänen açıqtan-açıq äytä ala dip belderde. Anıñ süzlärenä qarağanda, Bush xakimiate film turında başqa bernindi dä belderü yasamayaçaq. Michael Moore, Cannes festivale bülägen alu üz filmın Quşma Ştatlarda da tanıtuğa zur yardäm bulaçaq häm anı qarağan tamaşaçı noyäbr saylawlarında Bushnı tänqitlägän bu filmnı istä totar dip ömetlänä.

Kärim Kamal
XS
SM
MD
LG