Accessibility links

сишәмбе, 6 декабрь 2016, Казан вакыты 20:59

Qazan tarixına säyäxät


Çärşämbe könne Qazanda açılğan kürgäzmä 24nçe marttan 23nçe aprel'gä qädär zur uñış belän Mäskäwdä ütkän ide. Anda Qazan xanlığı häm şähär tarixın yaqtırtuçı iñ qimmätle dokumentları quyılğan bu kürgäzmägä dürt meñgä yaqın mäskäwlelär kilgän. Xäzer isä Rusiäneñ häm Tatarstannıñ arxivçıları äzerlägän bu kürgäzmä belän Tatarstan başqalasında da tanışıp bula. Yıl yarım däwamında dürt yözgä yaqın tarixi dokument, muzey eksponatları, kitaplar tuplanğan. Alar arasında Tatarstan muzeylarında ğına tügel, ä Mäskäw häm Sankt-Peterburg şähärlärendä saqlanğan dokumentlar da bik küp.
Kürgäzmäne açu uñayınnan 26nçı may könne uzğan matbuğat oçraşuında süz şuşı xaqta da bardı. Anda respublikanıñ mädäniät ministrı İl'dus Tarxanov, şähär xakimiäte başlığı urınbasarı Äl'fiä Tutaeva, baş arxiv idäräse citäkçese Damir Şäräfetdinov qatnaştılar.
Şul uq 26nçı may könne älege kürgäzmäne açu tantanası da uzdı. Anda respublika premyer ministrı urınbasarı Zilä Välieva, däwlät sovetınıñ milli komitetı räise Razil Väliev, tatar kongressı citäkçese Rinat Zakirov, deputat, tarixçı-akademik İndus Tahirov, Mäskäwdän kilgän arxivçılar qatnaştılar. Qazan xannarı yarlıqları, zatlı şäxeslärneñ kiemnäre, Ş.Märcäni, K.Nasıyri räsemnäre belän ber rättän Derjavin, Tolstoy, Ğor'kiy häm başqa Qazanğa bäyle şäxeslärneñ räsemnäre häm başqa bik küp qimmätle, siräk oçrıy torğan dokumentlar quyılğan monda. Şuşı qızıqlı häm bay kürgäzmä belän qazanlılar Qazan milli-mädäni üzägendä 25nçe iyüngä qädär tanışa alaçaq.
Al'bina Zäynulla, Qazan.

XS
SM
MD
LG