Accessibility links

шимбә, 3 декабрь 2016, Казан вакыты 12:33

Rusiä prezidentı yıllıq yullama belän çıqtı, anda xalıq tormışın yaxşırtu maqsatı quyıla


Mäskäw Kremleneñ Märmär zalı bügen yänä Rusiäneñ yuğarı citäkçeläre belän tulı ide - prezident Vladimir Putin üzeneñ yıllıq yullaması belän çığış yasadı. Anda ul asılda üze xakimiattä bulğan soñğı 4 yılğa yomğaq yasap, Rusiä xalıqara eşlärdä dä, finans mäs''älälärdä dä çın mäğnäsendä bäysez ilgä äylände dip belderde.

Rusiä prezidentı üzeneñ yıllıq yullamasın Federal'' Mäcleskä, yäğni Federatsiä Şurası häm Däwlät Dumasınıñ urtaq cıyılışına citkerä dip isäplänsä dä, däwlät başlığınıñ iñ möhim çığışın tıñlarğa ilneñ bar yuğarı citäkçelege, şul isäptän töbäk başlıqları da cıyıla. Yıllıq yullamasında Rusiä prezidentı ğädättägeçä ilneñ yaqın häm beraz aldaraq torğan kiläçägenä strategiäne bilgeli, bügen dä ul töp maqsat itep zamança wä mul il tözüne, bar xalıq tormışın, yäşäw şartların yaxşırtunı quydı.

Audio, Vladimir Putin

Döreslek xaqına şunı da äytergä kiräk, xalıq tormışın yaxşırtunı, ildä demokratik cämğiat tözüne, Rusiäneñ dönyadağı urının nığıtunı Vladimir Putin maqsat itep soñğı berniçä yılda inde quyğan ide, ä bügenge çığışında ul Rusiä xalqınıñ öçtän ber öleşe fäqirlekneñ dä tege yağında yäşi dip belderdep, mullıqqa ireşü eşeneñ bik ciñel genä barmawın tanıdı. Bıltır Rusiä prezidentı, aldağı 10 yılda ilneñ eçke tulayım citeşterü külämen ike märtäbä arttıru kiräklege turında beldergän ide. Şunnan soñ xökümättäge qayber citäkçelär, iqtisad belgeçläre moña ireşü mömkin tügel dip çıqsa da, Putin älege maqsatnı bıyılğı çığışında da qabatladı.

Audio, Vladimir Putin

İlneñ tışqı säyäsäte xaqında prezident Putin ällä ni küp söylämäsä dä, Rusiäneñ berençe çiratta Bäysez däwlätlär Berdämlege illäre, Amerika Quşma Ştatları häm Qıtay belän mönäsäbätlärgä östenlek biräçägen äytte. İğtibarnı tağın şul da cälep itte - Vladimir Putin, dönyadağı qayber köçlär Rusiäneñ kütärelüen, nığuın, anıñ bäysez häm köçle buluın telämi dip belderde. Anıñ fikerençä, ildä avtoritar xakimiat urnaşa dip qurqıtular añlı räweştä, däwlätne nığıtuğa qarşı maqsatta yasala, şuña kürä bu ölkädä "säyäsätebezneñ nigezläre üzgärmäyäçäk" di Rusiä prezidentı.

Audio, Vladimir Putin

Çeçnä suğışına kilgändä, prezident Putin anı elekkeçä, terrorğa qarşı alıp barğan köräşneñ ber öleşe itep kürä häm şuşı ayda anda Mäskäw üze bilgelägän Äxmät Qadırovnı üterü, Rusiäneñ çäçän säyäsäten üzgärtügä kitermäyäçäk dip belderä. İnde äytelgänçä, prezidentnıñ yıllıq yullamasın tıñlarğa Federal'' Mäcles deputatları ğına tügel, başqa citäkçelär, şul isäptän Rusiädäge töp dinnärneñ yuğarı ähelläre dä kilgän ide. Konstitutsiäsendä däwlät eşläre dinnän ayırılğan häm törle dinnärneñ tigezlege iğlan itelgän Rusiädä urıs pravoslav çirkäwe başlığı patriarx Aleksi İkençe, Konstitutsiä häm qanunnarnı xörmät itärgä öndägän Putinneñ çığışın berençe rättä, ilneñ premyer-ministrı Mixail Fradkov yanında utırıp tıñladı, ä menä möselman häm başqa din ruxanilärenä urın berniçä rät arttaraq birelgän ide.

Kärim Kamal
XS
SM
MD
LG