Accessibility links

Кайнар хәбәр

Quşma Ştatlar citäkçelege cäy aylarında ildä yaña terror höcümnäre bula ala dip kisätä


Amerika Quşma Ştatlarında aldağı aylar başqa yıllardağı tösle cäyge yallar mäşäqätennän bigräk terror qurqınıçı belän ütär kebek - ilneñ iminlege öçen cawaplı yuğarı wäkillär cäyge aylarda "äl-Qaidä" Quşma Ştatlarda yaña höcümnär äzerli dip kisätä. Alar üzläreneñ, moña işarä itkän mäğlümatkä iä buluın äytä.

Yaña terror qurqınıçı kisätüe xaqında "Azatlıq" radiosı inde xäbär itkän ide, xörmätle tıñlawçılar. Pänceşämbe tönendä bu xaqta Quşma Ştatlarnıñ yuğarı citäkçeläre dä maxsus belderülär belän çıqtı. Washingtonda uzğan matbuğat oçraşuında ilneñ yustitsiä ministrı John Ashcroft, üze citäklägän ministrlıqta, Federal'' tikşerülär üzäge FBİ-da häm Eçke iminlek ministrlığında, "äl Qaidä"neñ kiläse aylarda Quşma Ştatlarda kimendä ber zur höcüm oyıştırırğa cıyınuı xaqında "ışanıçlı mäğlümatı" bar dip belderde. Anıñ süzlärenä qarağanda, inde elekke oçraqlardağı tösle ük şuşı mäğlümat, höcümneñ qayda häm qayçan bula aluın äyterlek täfsille tügel, läkin "äl-Qaidä" çınnan da anı äzerläp yata kebek, di amerikan yustitsiä ministrı.

Audio, John Ashcroft

"Yaña yıl başında uq "äl-Qaidä" açıqtan-açıq Quşma Ştatlarda oyıştırılaçaq höcümneñ inde 70 protsentqa äzer buluın xäbär itkän ide, di Ashcroft häm älege fikeren däwam itep, "Madridtağı 11-nçe mart höcümennän soñ şul äzerlekneñ 90 protsentqa tögällänüe iğlan itelde" dip belderä. Quşma Ştatlarnıñ yustitsiä ministrı, aldağı dürt ay eçendä ildä zur terror höcüme yasala alırlıq berniçä möhim waqiğä kötelä di. Şularnıñ berençese itep ul bu şimbädä başqala Washingtonda İkençe dönya suğışı qorbannarına bağışlanğan yaña memorialnı açu tantanasın atıy. Annan soñ kiläse ayda Georgia ştatında, 8 industrial'' il citäkçeläreneñ yuğarı däräcäle oçraşuı ütäçäk, moñardan tış New York häm Boston şähärlärendä ildäge ike möhim partiäneñ saylawaldı cıyınnarı uzarğa tieş. John Ashcroft fikerençä, "äl-Qaidä" Quşma Ştatlarda noyäbrdä ütäçäk prezident saylawlarına yoğıntı yasarğa tırışaçaq. Monı raslaw yözennän amerikan yustitsiä ministrı İspaniä misalın kiterä häm, Madridta 11-nçe martta yasalğan höcümnär, öç kön soñraq uzğan ğomumi saylawlarğa nıq tä''sir itte dip belderä. Ashcroft belän bergä matbuğat oçraşuında FBİ mödire Robert Mueller da qatnaştı häm ul xäbärçelärgä, 6 ir häm ber xatın fotosüräten kürsätte. FBİ mödire alarnı "äl-Qaidä" höcümçeläre dip atadı, häm şularnıñ qayberläre inde Quşma Ştatlar cirendä dä bula ala dip belderde. John Ashcroft, şul şikle keşelär qorallı häm qurqınıç tudıruçan bula ala dip kisätä.

Audio, John Ashcroft

"Äl-Qaidä"neñ ideal'' suğışçısı 30 yäş tirälärendä bula ala, üzlären faş ittermäw maqsatında alarnıñ ğailä belän säyäxät itüe bik ixtimal, bezneñ küzläw çığanaqları "äl-Qaidä"neñ üzlären yevropalı itep tanıtqan keşelärne ezläwen raslıy" di Quşma Ştatlarnıñ yustitsiä ministrı Ashcroft. Şuşı kisätülärgä qaramastan ilneñ eçke iminlek ministrlığı terrordan kisätü däräcäsen älegä kütärmäskä buldı. Prezident Bushnıñ säyäsi köndäşläre, Aq yortnıñ soñğı xäwefle belderüläre Ğiraqtağı suğış näticälären häm amerikan ğäskäriläreneñ Äbu Ğraib törmäsendäge totqınnarnı cäberläw cäncalın artqa etärü teläge belän añlatıla dip belderä.

Kärim Kamal
XS
SM
MD
LG