Accessibility links

пәнҗешәмбе, 8 декабрь 2016, Казан вакыты 23:14

Xodorkovski eşen qaraw tağın 10 köngä kiçekterelde, YUKOS bölgenlekkä çığa aluı xaqında kisätä


Bügen Mäskäwdä mäğlüm eşmäkär, YUKOS şirkäteneñ elekke başlığı Mixail Xodorkovskine törle cinayätlär qıluda ğäyepläw eşen tikşergän mäxkämä utırışı açılğan ide. Läkin utırış başlanu belän anı kiläse atnada däwam itü turında qararğa kilende, bu Rusiäneñ salım ministrlığı wäkile üteneçe nigezendä eşlände. Mäxkämäneñ çirattağı utırış xäzer 8-nçe yündä ütärgä tieş bulaçaq.

Mäskäwdäge Meçan mäxkämäse Mixail Xodorkovski eşen, anıñ xezmättäşe, şulay uq YUKOS citäkçelegendä eşlägän häm şulay uq Xodorkovski kebek ük prokuratura tarafınnan ezärleklängän Platon Lebedev eşe belän berläşterüne qararğa tieş ide. Läkin utırış açılu belän anda şahid bularaq qatnaşqan, Rusiäneñ salımnar ministrlığı wäkile cinayät eşen öyränügä östämä waqıt birüne ütende. Moñardan tış mäxkämä, prokuratura äzerlägän ğäyepläwneñ Mixail Xodorkovskigä berniçä bitsez birelüen açıqlap, monı anıñ xoquqların bozu dip bäyäläde häm ğäyeplängän zat anıñ belän tulısınça tanışırğa tieş dip, mäxkämä utırışın tağın 10 köngä kiçekterergä, anı 8-nçe yüngä bilgelärgä buldı. Şul uq köngä Platon Lebedev eşen qaraw da küçerelä. Şulay itep, aylar däwamında cämäğätçelek küzennän çittä totılğan Xodorkovski, bügen mäxkämägä kiterelsä dä, şunda uq kire "Matrosskaya Tişina" törmäsenä qaytarıldı. Utırışnıñ yabıq buluı säbäple mäğlümat çaraları wäkillärenä anı kürü mömkinlege birelmäde, mäxkämägä Xodorkovskineñ yaqın tuğannarı ğına kertelde. Anıñ änise soñraq xäbärçelärgä, ulınıñ üzen aqlağan xökem qararı çığaruğa ömetlänmäwen, häm aña yanağan 10 yıllıq törmä cäzasınnan qurıqmawın äytte. Mixail Xodorkovski barlığı 7 törle ğäyepläw astında tora, alar arasında xärämläşü, urlaw, mölkätkä zian kiterü häm salımnar tüläwdän qaçu kebekläre dä bar, mäxkämä anı ğäyeple dip tapsa aña çınnan da 10 yıllıq törmä yanıy. Xodorkovskineñ advokatları, ul uzğan üktäbrdä qulğa alınğannan birle, anı fidiä aqçasına irekkä çığarıp torırğa tırışa. Läkin alar bu ölkädä hiç uñışqa ireşä almadı, comğa könne isä şuşı mäs''älä ğomumän qaralıp ta tormadı. Bu xaqta advokatlarnıñ berse Genrix Padva xäbär itte. Mäxkämä utırışın 10 köngä kiçekterü qararın isä ul, yaqlaw yağı añlıy almağan säbäplär belän añlattı.

Audio, Genrix Padva

Bu atnada Mäskäwneñ arbitraj mäxkämäse YUKOS äle 2000-nçe yılda uq däwlätkä tülämi qalğan 99 yarım milliard sum salım xäzer tulısınça tülänergä tieş digän qarar çığardı. Bu yaqınça 3 yarım milliard dollar digän süz. Moña cawap yözennän YUKOSnıñ xäzerge citäkçelege, bügenge köndä bezdä irekle 800 million dollar ğına bar, ägär dä bez mäxkämä qararın ütäsäk YUKOS şuşı yıl azağına bölgenlekkä töşäçäk, bez monı aldan uq äytep quyabız dip belderde.

Kärim Kamal
XS
SM
MD
LG