Accessibility links

дүшәмбе, 5 декабрь 2016, Казан вакыты 01:32

Söğüd Ğaräpstanda totıq itep alınğan çit il keşeläre azat itelde


Söğüd Ğaräpstannıñ könçığışındağı Xobar şähärendä çit il neft şirkätlärenä bulğan höcüm näticäsendä totıq itep alınğan 50gä yaqın keşeneñ kübese azat itelgän. Bu xaqta söğüd iminlek xezmätläre xäbär itte. Bu ayda ğına inde ike tapqır Söğüd Ğaräpstandağı neft şirkätläre häm çit il keşelärenä höcüm yasaldı. Könbatış mäğlümat agentlıqları, cirle polisiä mäğlümatenä nigezlänep, al-Qaida suğışçıları buluda şiklänelgän qorallanğan keşelärneñ yulbaçısı xärbi çara waqıtında qulğa alınğan häm ike suğışçı atıp üterelgän dip xäbär itte. Suğışçılar törkemendä bulğan qalğan 4 yä 6 keşeneñ yazmışı (alarnıñ tögäl sanı bilgele tügel) xäbär itelmi.

Kiçä totıqlarnı azat itü çarası başlanğanda Xobar şähäreneñ şul öleşendä şartlawlar häm ut açqan tawışlar işetelä ide. Söğüd Ğaräpstannıñ iminlek xezmäte wäkile Reuters mäğlümat agentlığına, xärbi operasiä waqıtında totıqlar arasında ülüçelär bar ide, dip belderde. Ämma alarnıñ tögäl sanı yä qaysı millät wäkilläre buluı – xäbär itelmi. Xobardağı şul yortlar kompleksı citäkçese totıq itep alınğan 3 keşe bügen üterelde, alar arasında ber amerikan häm ber britan keşese bar, dip belderde. Amerikan ilçelege älegä bu xäbärne raslamadı. İminlek xezmäteneñ başqa ber wäkile azat itelgän totıqlar arasında amerikannar häm yevropalılar bar, dide.

Filipin däwläteneñ Riyadtağı ilçese Bahnarim Guinomla, Frans Press xäbär agentlığına, totıq itep alınğan 3 filipin keşese üterelde, dip belderde. Ämma alarnıñ – totıq itep alınğaç üterelgänen yäisä azat itü çarasında hälak bulğannarın ber keşe dä raslıy almadı.

Britaniä tışqı eşlär ministrlığı ülüçelär arasında britannar buluı turında räsmi belderü yasawdan tıyıldı. Ämma Londonda çığuçı ike gazet – The Mail häm The Observer, Britaniäneñ Neft şirkäte citäkçese kiçä üterelgän häm suğışçılar anıñ mäyeten ber çaqrımnan artıq aranı maşinağa tağıp österägän dip yazıp çıqtı. Bu keşe Apicorp – Ğaräp Nefte Exportı belän şöğellängän şirkätneñ citäkçese bulğan.

Söğüd Ğaräpstan şaxzadäse Abdullah bin Abdul Aziz, älege waqiğalärgä kisken täñqit belderde, däwlät televideniä kanalında çığış yasap ul, şimbä könne distägä yaqın söğüdi häm çit il keşeläre hälak buldı, dip belderde: "Mondıy xälneñ qabatlanmawı öçen söğüdilär häm monda yäşäwçe başqa keşelärne borçıy. İslamğa nindi dä bulsa qatnaşı bulğan keşelär monı ber qayçan da xuplıy almayaçaq," dide Abdullah.

Höcümnär häm totıq alu öçen cawaplılıqnı al-Qaida terror çeltäreneñ ber qanatı bulğan al-Quds brigadası üz östenä aldı. Totıqlar arasında amerikan, italyan, britan watandaşları häm ğaräplär bulğan.

Söğüd Ğaräpstan polisiäse mäğlümatlärenä qarağanda 4-5 islam terrorçısı avtomat, granata häm quldan yasalğan bombalar belän qorallanıp totıqlarnı ber biek yörtnıñ öske qatında totqan bulğan.
XS
SM
MD
LG