Accessibility links

шимбә, 3 декабрь 2016, Казан вакыты 20:44

1 Yün - Xalıqara balalarnı yaqlaw könne


1 yün - Xalıqara balalarnı yaqlaw könne Qazanda yätim, çirle, awır ğailäle balalarğa iğtibar zur ğına buldı. Ämma äybät ğailälärgä yärdäm citäme? Soñğı yıllarda sabıylar azraq tua. Moña qarap balalarğa iğtibar kimemi, arta ğına bara.
Xalıqara balalarnı yaqlaw köne uñayınnan Qazanda küp kenä çaralar uzdı. Şähärneñ «Krıl''ya Sovetov» parkında düşämbe könne balalar öçen sirk, teatr-moda, törle räsemnär yasaw häm başqa küp qızıqlı çaralar tuplağan bäyräm oyıştırıldı. Näq bäyräm könne Qazannıñ İdel-press näşriätınıñ plyajında hawa yılannarınıñ festivale uzdı. Anda balalar qulı belän yasalğan berniçä distä oçqıç yılanın kükkä oçırdılar häm raketomodelistlar tamaşası uzdı. Bauman uramında uzğan “Prolomnaya uramında bäyräm” isemle tamaşa, respublikanıñ rässamnar berlegendä açılğan Qazan uquçılarınıñ icadi kürgäzmäse dä balalar öçen äzerlängän.
Bu könne çıqqan mäğlumat çığanaqları da balalarnı yaqlaw könenä bağışlan möhim xäbärlär tarattı. «Watanım Tatarstan» gäcitendä respublikanıñ yäşlär eşläre häm sport ministrı Marat Barievnıñ xalıqara balalarnı yaqlaw köne uñaennan äytelgän qotlawı basılğan. “Tatarstan yäşläre”ndä tanılğan keşelärneñ xäterlärendä qalğan balaçaq mizgelläre basıldı.
Elegräk balalar östenlekle sıynıf dip atala ide. Xäzer dä bu maqsat qalamı? Ber genä misal - bıyıl cäy uquçılarnıñ cäyge yalın oyıştıru öçen Tatarstan xökümäte biş yöz meñ sum aqça bülä. Läkin ul summa da citmi äle. Respublikanıñ qayber citäkçeläre balalarğa quldan kilgänçä yärdäm kürsätep qalırğa tırıştılar. “Berdäm Rusiä” firqäseneñ äğzäläre, mäsälän, Qazannıñ “Zdravuşka” üzägeneñ invalid balaları öçen üzençälekle bäyräm oyıştırdı. “Tatspirtprom” berläşmäse Bua rayonı balalar yortında häm Çüpräle yätimnär priyutında tärbiälänüçe 80 yätim bala öçen xäyriä aksiäse ütkärde. 30nçı may könne tämamlanğan “Qulğa qul totınıyq, duslar” festivale dä ğärip balalar öçen ütkärelgän ide.
Räsmi dairälärdän çittänräk toruçı cämäğät oyışmaları isä xakimiät kürsätmälären kötep tormıyça, üz çaraların ütkärde. Ul''yanov Lenin yort-muzeenda oyıştırılğan «Tügäräk östäl»dä balalarnı yaqlaw könenä bağışlanğan ide. Anda «Däw änilär» oyışması, «Yärdämçe» dip isemlängän ictimaği xäyriä fondı, Lenin muzey mödire, küp balalı änilär, opekunnar häm yätim-balalar oyışmalarınıñ citäkçeläre qatnaştı.
Tügäräk östäl «Bezgä tınıçlıq kiräk» digän şiğar astında uzdı. Anda cıyılğan xanımnar bik citdi mäs''älälär kütärde. Alarnıñ berse - eşçe ata-analarnıñ daimi eş xaqı kürmäwe häm balalarnıñ açlıqqa integüe, dip äytelde. Şulay uq “Tügäräk östäl”dä qatnaşuçılar dönyada barğan suğışlarnı häm terrorizmnı beterergä öndi. Şuşı häm başqa küp kenä nujalarnı tügäräk östäl äğzäläre Rusiä häm Tatarstan prezidentlarına, başqa citäkçelärgä atap yazılğan xatlarında da açıq itep äyttelär. 21nçe ğasır - fäqirlek belän köräşü ğasırı. «Tügäräk östäl»dä qatnaşuçı – qıyu xanımnar - dönyanı qotqaru, räncetelgän balalarnı yaqlaw öçen köräşkä kütärelgännär. Balağa birelgän qullanma-posobieneñ küläme anı kön sayın ipi-söt belän genä bulsa da tä''min itärgä citärä tieş. Eşsez qalğan ata-ananıñ balanı tuyındırırlıq aqçası yuq, ä cämğiätkä zıyan. İqtisat araqı, narkotik, xatın-qız tänen satu häm fäqir xalıqnı talaw belän üsärgä tieş tügel. Çirle balalarğa «Ana häm bala» jullaması citmi. Yäş buın xezmätkä öyränep üssen, yäşlärgä pioner, komsomol xäräkätläre qaytsın, alar öçen radio häm televideniedä tärbiäwi programmalar äzerlänsen, didelär däw änilär. Qısqası, balalarnı, yäş buınnı üsterü öçen däwlätneñ dä, cämäğätçelekneñ dä quäte kiräk.
Al''bina Zäynulla, Qazan.

XS
SM
MD
LG