Accessibility links

шимбә, 10 декабрь 2016, Казан вакыты 04:22

Başqortstan ğalime Ruşan Ğällämov : Tatarstannıñ qul suzğanın kötäbez


Bügen Qazanda «Küpmillätle häm törle dinle töbäklärdä grajdanlıq cämğiäten tözü» digän temağa bağışlanğan fänni-ğämäli konferensiä üz eşen başlap cibärde. Anı Karnegi üzäge häm Qazandağı federalizm institutı oyıştırdı.



Konferensiä «Üzäk häm töbäklärdä demokratiä häm avtoritar tärtiplärgä omtılışlar» digän temağa bağışlanğan utırış belän başlanıp kitte. Anda kübesençä cämğiät häm xakimiät, millätlär mänfäğäte turındağı notıqlar uqıldı. Qazan däwlät universitetı professorı Galina Morozova, sotsiologik tikşerü näticäläre belän tanıştırıp, yäşlärneñ xakimiätkä bik ışanıp betmäwen belderde. Anıñ äytüençä, yäşlär Mäskäw xakimiätlärenä qarağanda cirle citäkçelärgä kübräk ömetlär bağlıy, çönki alar yaqınraq häm añlayışlıraq. Şuşı uq ğalimä fikerençä, xäzerge Rusiädä säyäsät avtoritarizmğa taba yünäleş alğan. Başqortstannan kilgän professor Ruşan Ğällämov watandaşlıq cämğiätendä millät mänfäğätläreneñ nindi urın alıp toruına bağışlanğan notıq uqıdı. Anıñ äytüençä, Tatarstan häm Başqortstan citäkçelärenä, ğalimnärgä, tatar milli oyışmalarına, östän quşqannı kötmiçä, üzlärenä Başqortstan tatarları problemasın xäl itärgä turı kiläçäk. Bu eştä Tatarstannıñ qul suzğanın kötäbez, dide Ruşan Ğällämov.

Şulay uq Ufadan kilgän ğalim İldar Ğabdrafıyqov, Başqortstan temasın däwam itep, saylawlardan soñ tuğan wazğiät turında notıq yasadı. Ul xäzerge xällärne avtoritar tärtip dip atadı. Konferensiädä şulay uq, milli häm dini berleklärneñ mönäsäbätläre, Rusiä möselmannarı arasında tatarlarnıñ nindi urın alıp toruı xaqında da çığışlar yasaldı. Konferensiä 3 yüngä qädär dä däwam itäçäk. Anda mäsälän, başqa dingä, mädäniätkä tüzemlelek tärbiäläw problemaları, latin grafikası tiräsendäge xäl qaralaçaq.

Bikä Timerova.

XS
SM
MD
LG