Tatarstannıñ Milli muzeyında bu könnärdä Büläklär köne uza. Respublikanıñ Milli muzeyında Büläklär könen uzdıru matur ber ğädätkä äwerelde. Mondıy çara muzeyda 1997 yıldan birle ütkärelep kilä. Bıyıl ul 1 yünnän 6na qädär däwam itä. Şuşı könnärdä här telägän keşe Milli muzey öçen üzläreneñ şäxsi arxivlarında saqlanğan äyberlären tapşıra ala. Älbättä, muzeyğa eksponatlarnı başqa waqıtta da tapşırıp bula, läkin şuşı çara ütkän könnärdä kilüçelär ayıruça küp bula. Muzey xezmätkärläre bäyäsenä dä qaramastan härber tapşırılğan eksponatnı şatlanıp qabul itälär. Şunısın da äytergä kiräk, Büläklär köne Milli muzeynıñ üzendä genä tügel, ä rayon, awıl muzeylarında da ütkärelä. Mäsälän, şuşı könnärdä genä Minzäläneñ Tuğan yaq muzeyı, Çüpräleneñ Cir häm keşelär muzeyı şuşı çara qısalarında üzläreneñ ekspozitsiälär öçen şaqtıy qızıqlı äyberlär tupladı. Ä Milli muzeyğa Büläklär könnärendä närsälär alıp kilälär soñ? Bu xaqta muzeynıñ ädäbi bülege ölkän xezmätkäre Flürä xanım Däminova söyli.
Bezneñ muzeynıñ Büläklär könendä şaqtıy ğına keşe qatnaşa. Alarğa törle näşriätlär dä quşıla. Bez bar çıqqan kitaplarnı da satıp ala almıybız, ä alar bezgä üzläreneñ basmaların büläk itälär. Şulay uq, yazuçılar, tanılğan keşelär dä onıtmıy bezne. Mäsälän, bu yulı Rawil Fäyzullin, Ğädel Qutuynıñ malayı Röstäm Qutuy ätisenä qağılışı materiallar tapşırdıXäyer, Büläklär könendä muzeyğa üzläreneñ äyberlären tanılğan, bilgele keşelär genä tügel, ä ğadi qazanlılar da, balalar da tapşıralar ikän. Alar üzläre tapqan qomğan, çülmäk qıypılçıqların alıp kilälär. Şulay uq çigüle sölgelär, namazlıqlar häm başqa küp kenä äyberlär tapşıralar muzey xezmätkärlärenä bu könnärdä. Tapşırılğan äyberlär ğalimnär tarafınnan öyränelep, alarnıñ tarixi qimmäte bilgelängännän soñ, Milli muzeynıñ ekspozitsiäsendä tieşle urının alaçaq, di Flürä Däminova. Häm bar Azatlıq radiosı tıñlawçılarına möräcäğät itep, bezneñ muzeyğa äyberlärne tağın da kübräk tapşırsınnar ide, dip östi. Xäzerge waqıtta Qazan kremle tiräsendä yaqın kiläçäktä açılaçaq Böyek Watan suğışı muzeyına materiallar tuplaw bara. 1 yünnän 6 qädär däwam itäçäk Büläklär könnärendä älege muzey öçen dä eksponatlar kötep qalalar.
Gölnaz İlgizär
