Accessibility links

якшәмбе, 4 декабрь 2016, Казан вакыты 00:52

Däwlät Şurası eşe qızulana


3 yündä Tatarstan Däwlät Şurasınıñ öçençe çaqırılış deputatları öçençe utırışlarına cıyıldılar. Kön tärtibenä 47 mäsälä bilgelängän ide. Barısı da qanun çığaru, qanun üzgärtü kebek qatlawlı häm mäşäqätle mäsälälär tügel älbättä. Andıyları ike distägä yaqın ide. Läkin kön tärtiben kileştergändä deputatlar tağın ike distägä yaqın mäs''älälär täqdim ittelär. Täqdimnär arasında şulay uq şaqtıy cäncallı bulıp işetelgännäre dä buldı. Kommunistlar fraksiäse citäkçese Aleksandr Saliy korrupsiä faktları buyınça deputat sorawları kertüen belderde. Bu öç soraw reglamentta qaralğança kön tärtibeneñ “törlesennän”- digän bülegenä kerteldelär. Demokratik köçlär tarafdarı deputat Aleksandr Ştanin şulay uq qolaqqa kererlek mäs''älä kütärde. Ul kön tärtibenä “Tatarstanda balalar belän mäktäptän tış eşläw sistemasın yuq itüdän yaqlaw” mäsäläsen täqdim itte. Aña bilgele bulğança xökümät 2005 yılğa byudjet proyektın tözegendä çığımnarnı optimal’läşterüdä mäktäplärdä sıynıftan tış eş sistemasın da optimal’läşterä. Yäğni ğadiräk itep äytkändä mäktäplärdä däreslärdän soñ oyıştırıla torğan tügäräklärne, sport seksiälären tüläwle itärgä niätli. Bu eşkä qaralğan byudjet çığımnarın ata-analardan cıyıp alınaçaq ikän. Dimäk bu tüläwle tügäräklärdän balalar bizä başlayaçaqlar. Deputat Ştanin küzätüençä inde xäzer ük mäktäp tirälärendä üz ixtiarlarına qaldırılğan balalar törkemnäre işäya başlağan häm bu deputatqa siksänençe yıllar wäzğıäten xäterlätä. Yäğni mäğlümat çaraları “Qazan fenomenı” dip isemlägän yäşüsmerlärneñ cinayätçel törkemnärgä tuplanuı. Aleksandr Ştanin äytüençä monı respublikanıñ Eçke eşlär ministrlığınıñ soñı waqıtta tuplağan mäğlümätläre dä raslıy. Mäktäp balalarınıñ 8 protsentı narkotiklar tatıp qarağan, läkin ğämäldä bu san 10 tapqırğa kübräk dip sanıy deputat. Balalar faxişälege artuı qurqıta. Şul şartlarda mäktäplärdäge tügäräklärne, seksiälärne tüläwle itü, Ştanin fikerençä balalarnı mäktäptän tış eş sistemasınnan çığara häm cinayätçel törkemnär, narqodellerlar, sutenerlar qoçağına taşlıy. Bu täqdimne Däwlät Şurası kön tärtibenä kertü-kertmäwne tikşergändä prezident Mintimer Şäymiev süz aldı. Anıñ fikerençä 2005 yılğa byudjet tözü mäsälälären tikşerergä äle irtäräk. Çönki äle añıñ proektı xäzergä yuq. Äzer bulğaç deputatlar anı tikşerüdä qatnaşaçaqlar. Ä deputat Saliynıñ korrupsiä turındağı sorawları sezgä, xörmätle tıñlawçılarıbız, xäbärlärebezne äzerläp betergän säğätlärdä äle tıñlanmağan ide. Şulay bulğaç Däwlät Şurası utırışı turında işetäsegez kilsä kiläse tapşırularıbıznı tıñlağız.

Yunıs Ätnäle, Qazan

XS
SM
MD
LG