Accessibility links

пәнҗешәмбе, 8 декабрь 2016, Казан вакыты 05:18

NTVnıñ tanılğan jurnalistı Leonid Parfenov ni öçen eştän quıldı?


Bu könnärdä Rusiädä töp yañalıqlarnıñ berse - NTV televideniesendä Namedni dip atalğan tapşırunı alıp barğan Leonid Parfenovnıñ eştän quıluı buldı. Räsmi añlatmada jurnalist xezmät kileşüen bozuda, kanal citäkçelege säyäsätenä qarşı çığuda ğäyeplänä. Ämmä küplär, bu waqiğanı senzura, Rusiädä süz ireklegen çikläw ğämäle dip bäyäli.

Parfenovnıñ Namedni dip atalğan tapşıruı, döresen äytkändä, säyäsi tapşıru tügel, professional däräcädä äzerlängän tamaşa ide. Däwlät qaramağındağı başqa kanallarda inde küptän yuqqa çıqqan türälärgä tänqit süzlären Parfenov äytsä dä, yomşaq itep, ironiägä törep äytä ide. Küräseñ, sovet çorı xälenä qaytqan bügenge Rusiädä xättä şuşı ğäyepsez tapşıru da küz köyege bulıp torğan. Parfenov üze äytüençä, Namedni bik popular buluğa, zur keremnär kiterügä qaramastan, citäkçelär inde küptän annan qotılu yulların ezlägän. Uñaylı forsat uzğan yäkşämbedä tuğan. Ul könne tapşıruda Çeçnyanıñ elekke prezidentı Qatarda üterelgän Sälimxan Yandarbievnıñ tol xatını Mälikä xanım belän äñgämä bulğan. Rusiäneñ könçığışına kitep ölgergän bu süjetnı NTV citäkçeläre Yevropa öleşe, Mäskäwgä kitäse efirdan alırğa quşqan. Alar monı maxsus xezmätlärdän kürsätmä dip añlatqan. Xäzerge waqıtta Qatarda Yandarbievnı üterüdä ğäyeplängän ike Rusiä agentı östennän mäxkämä eşe bara. Mälikä xanım äñgämädä fäqät üzeneñ tol tormışı turında söyli, Qatarda barğan mäxkämägä ul niçek tä''sir itä aladır, Parfenov monı üze dä añlamıy, läkin exclusive äñgämäne birmi qala almadım di ul. Şuşı xällär turında jurnalist Kommernt basmasına citkergän. NTVnıñ xäzerge citäkçese Nikolay Senkeviç monı xezmät kileşüen bozu dip Parfenovnı eşennän qudı. Quılunıñ säbäplären Parfenov üze bolay añlattı:

Audio (Leonid Parfenov)

"Säbäplär räsmi qäğäzdä başqaça añlatılğan. Çınında ul Yandarbieva belän äñgämä, ul efirdan alındı, min moña qarşı idem, yazma färmanğa ğına buysındım, häm dä bu xällärne yäşerüdän baş tarttım."

"Bu Senkeviç üze qabul itkän qararımı?" digän sorawğa, Parfenov, üzeneke bulsa, ul anı küptän qabul itkän bulır ide, älbättä bu östän kilgän kürsätmä, dide. Rusiä Jurnalistları Berlege general sekretare İgor Yakovenko Parfenovnıñ quıluın, NTV, TVS kanalları yabıku belän tiñ torğan waqiğa dip atadı. "Rusiädä senzura, däwlät kanalları östennän kontrol urnaşqanın härkem belä ide, läkin Parfenov kebek qayber yoldızlarğa çiklängän bulsa süz äytergä röxsät itelä ide, küräseñ xäzer monısı da beterelä, dide ul.

3 yıl elek Gusinskinıñ NTV kanalı taratılğanda, andağı tanılğan jurnalistlarnıñ kübese kitte, ä menä Parfenov qalğan ide. Küplär anıñ bu adımın satılu dip atadı. Yaña citäkçe Boris Yordan qulı astında qanal, quş tırnaqlar eşendä "tärtiplänsä dä", Kreml cırın cırlağan berençe häm ikençe kanallardan bareber beraz ayırıla ide. Xäzer Yordannı alıştırğan medetsina fännäre doktorı Nikolay Senkeviç, inde Namedni kebek qıtırşı urınnarnı da, tigezläp beterer sıman. NTV, däwlät qaramağındağı qalğan ike federal kanal, ORT häm RTR kebek, Çeçnyada xällärneñ normalläşüe, prezidentnıñ här adımı, qırlardağı mul igennär, Berdämlek dip atalğan yäşlär oyışmasınıñ izge eşläre turında döres häm matur süzlär söyläp toraçaq. Tik menä berük cırnı başqarğan 3 kanal nigä kiräk ikän? Sovet çorında bi monıñ öçen ber kanal da citä ide.

Ali Gilmi, Praga
XS
SM
MD
LG