Accessibility links

шимбә, 10 декабрь 2016, Казан вакыты 15:47

Härkemneñ üz Sabantuyı


Dönyadağı iñ xikmätle, iñ äkämät närsä - ul keşe xolqı, anıñ ruxi xaläte. Adäm balasınıñ küñele - üze ber moğciza. Qaywaqıtta aña zäp-zäñgär kükle, çalt ayaz kön qarañğı bulıp toyıla. Ni öçen disägez, bälki ul keşeneñ berär äğzası sızlıydır, bälki anı räncetkännärder, bezneñ xalıqqa adäm räncetü bötenläy kileşmi. Açu kilgändä dä, ipläp kenä sizderü, tawış kütärmäw elek-elektän ğailädä tärbiälängän ber sıyfat. Ä ikençe waqıt - xätta salqın, yañğırlı, cille köndä dä küñel cırlap tora, meñlägän keşelär matur itep kienep, yuış tuğaylarğa çığa, cil sızğıru belän yarışıp cırlıy, yañğır suına qaynar tiren qatıştırıp köräşä. Çönki Sabantuy ul bit yılğa ber genä bula. Anda keşelärneñ uñay energiäse, maturlıqqa omtılu, küñel cırlawı belän qatnaşıp, nindider ğäcäyep räxätlek kiterä torğan cılılıqqa äwerelä. Yawsın äydä, yawsın, içmasam ikmäk uñar. Busı inde kiläse şimbä häm yäkşämbe könnärendä Sabantuyı ütkärüçe rayonnarğa säläm dip añlağız. Arçadan, Minzälädän, Norlattan häm başqa töbäklärdän Qazandağı dusların qunaqqa çaqıruçılar bu yalnı matur ütkärerlär. Respublikanıñ ber yağında kön qoyaşlı, ikençesendä bolıtlı bulsa da, aptırarğa kiräkmi. Monısı - tabiğät xikmätläre.

Ä menä keşeneke. İyün ayınıñ axırında Bötendönya tatar yäşläre forumı iğlan itelde. Waqıt az, delegatlar saylarğa, şäpläp äzerlänergä kiräk. İ totındılar zarlanırğa qayberäwlär. Niçek inde ul 24 iyündä, mäktäplärdä imtixan, attestat öläşü, universitetlarda sessiäneñ qızğan çağı. Nişläp inde şul waqıtta Qazanğa yözlägän, xätta meñgä yaqın yäş keşene cıyıp, uqudan ayırasız. Bälki sezgä, yulär, uqımağan yäşlär genä kiräkter. Uramda tray tibep yörüçe yäşlär forumı bulmasın ide, dip yazdılar İnternet päräwezendä. Nindider säbäplärdän bu forum kiçekterelä qalsa, moña da cawap şul uq İnternetta bar. www.İntertat.ru elektron gazetasınıñ forumında bu oçraqqa da qapma-qarşı mäğnädäge protest xatları bar. Nişläp anı kiçekterergä di, ni qarıysız anda? Keşeneñ tabiğätenä berniçek tä yarap bulmıy. Cäygä kersä ul qışnı sağına, ä qış könnärendä barı cäy turında xıyallana. Qayber yegetlärebez qara çäçle qız belän uram buylap barğanda, qarşığa kilüçe zäñgär küzle blondinkalarğa qarap soqlanalar.

Ä bez, jurnalistlar, barısın da añlap ğädel itep xäbär birergä tieş. Şuşı arada ğına Orel şähärendä Rusiä yazuçılarınıñ 4-5 oyışmasınıñ berse ütkärgän qorıltayğa Tatarstannıñ ike möxtäräm yazuçısı barıp qayttı. Alar urap qaytqaç, icatçılar arasında bäxäs qupqan - bez bit ul oyışmada tormıybız, bezneñ möstäqil oyışmabız monda, Qazanda, dilär beräwlär. İkençeläre Mäskäwdäge tağı ber Yazuçılar berlegen maqtıy. Yazuçılar bit, alar arasında fiker yarıştıru bulu mömkin. Xikmäte şul - ber genä yazuçı da, jurnalist ta, gäcit, televidenie, radio xezmätkäre dä qäläm iäläreneñ şuşı diskussiäse turında ber genä süz dä äytmäde häm yazmadı. Yarıy äle “Mädäni comğa” bu säfär turında keçkenä yazma urnaştırdı. Yäğni, tormışta Şekspir dramaları, ä cämäğätçelek, mäğlümat möxitendä tıp-tın. Cil dä ismi häm, döres, qoyaş ta yaqtırtmıy.

Soñğı xikmät - qabatlaw. Uzğan comğada söylädek. Qazanda kitap kibetläreneñ arenda bäyäsen 4 tapqır arttırıp, ber metr öçen 200 sum alalar. Ä beläsezme, Mäskäwdä kitap kibetlärendä arenda bäyäse küpme? Näq 40 sum. Ä Başqortstanda bötenläy buşlay. Yäğni, kitap kibetlärennän arenda almıylar. Xikmätle xällärdä şul uq comğa könne Tatarstan skladlarında törle yıllarda basılğan 700 isemdäge kitap yatuın äytkän idek. Üzläre ällä ni qıybat ta tügel, kübese tatar telendä. Menä şul turıda bezneñ milli cämäğätçelek beläme ikän? Bälki, beläder. Läkin hiçkemneñ ise kitmi, berkem ğäcäplänmi. Barısı da tıp-tın. Xikmät tä, moğciza da, aqılğa sıymaslıq citeşsezleklär dä eçebezne poşırmağaç, nişlärgä inde? Bälki, sez beläsezder?

Rimzil Wäli

XS
SM
MD
LG