Şulay itep Däwlät Şurasınıñ 3 iyün könne uzğan utırışında kön tärtibendä aldan bilgelänep quyılğan 47 mäs’älägä tağın 10 östämä kerttelär häm barlığı 57 mäs'älä tikşerdelär. Bu san yağınnan kürsätkeç bulsa , Tatarstandağı mäğlümat çaraları sıyfat yağın da bilgeläp ütälär. İnde ber yıl tikşerüdä bulğan “Tatarstan Respublikasınıñ İsäp-xisap palatası turında”ğı qanunı qabul itelde. Xäzer İsäp-xisap palatası parlament kontrole orğanınnan däwlät finans kontrole oyışmasına äylänä. Anı Däwlät Şurası oyıştırsa da, ul eşçänlegendä Däwlät Şurasında xisap totmayaçaq häm respublika külämendäge kontrol' orğan bula. İkençe uqılışta qabul itelgän “Tatarstan Respublikası däwlät xakimiäteneñ başqarma orğannarı turında”ğı qanunğa deputatlar 82 tözätmä tikşerdelär häm 38 xupladılar. Mäğlümat çaraları başqarma oyışmalar eşçänlegenä älege qanunnıñ citdi üzgäreşlär kertüen bilgeläp üttelär. Äytik Ministrlar kabinetı byudjet ütäleşe turında elek Däwlät Şurasına mäğlümat kenä birergä tieşle bulsa, xäzer xisap totarğa burıçlı bula. Qanun respublika külämendä ähämiätle şähär başlıqları wazifasına kilü tärtibenä açıqlıq kertte. Mäğlüm ki älegä Tatarstanda administratsiä başlıqların saylaw turında qanun qabul itelmägän. Şuña kürä başqarma oyışmalar qanunına-“Rayon administratsiäse häm respublika küläm ähämiätle şähär administratsiäse başlıqları saylaw /bilgeläü/ tärtibe tieşle qanun qabul itelgänçe Tatarstan prezidentı tarafınnan bilgelänä“- digän maddä kertelde. Älegä maddä iñ berençe çiratta yaqınlaşıp kilgän Qazan şähäre administratsiäse başlığı saylawlarına, ä bälki bilgelänüenä qağıla. Däwlät Şurasınıñ 3 utırışında tağın ber fraksiä häm ber deputat törkeme oyışu turında belderelde. 75 deputattan torğan “Yedinaya Rossiä” fraksiäsen Qanunçılıq, reglament häm deputat etikası komitetı räise Aleksandr Gusev citäkli. Ä 11 deputattan torğan “Tatarstan yaña ğasır” törkemen şulay uq “Yedinaya Rossiä” wäkile, İqtisat, investitsiälär häm eşmäkärlek komitetı räise Marat Galiev citäkli. Ğämäldä bu törkemneñ küpçelegen “Yedinaya Rossiä“ isemlegennän saylanğan deputatlar täşkil itä. Üz saflarınnan “Tatarstan yaña ğasır” deputat törkeme oyıştırırğa “Yedinaya Rossiä” firqäseneñ säyäsi şurası fatixa birgän. Ä inde kommunistlar fraksiäse citäkçese Aleksandr Saliynıñ korrupsiä turındağı deputat sorawlarına kilgändä, ğämäldä alarnıñ berse genä Möslim rayonındağı korrupsiä turında bulıp çığa. Qalğannarı grajdannarnıñ törle oyışmalarnıñ eşçänlegenä şikäyätlär ikän. Älege sorawlar deputatlarğa iğlan iteldelär. Deputatlar tarafınnan rizasızlıqlar belderelmägäç, reglament quşqança möräcäğätlär adresatqa, Tatarstan prezidentına tapşırıldılar. Yunıs Ätnäle.
