Uzğan yal könnärendä Tatarstannıñ awıllarında häm rayon üzäklärendä, qayber şähärlärendä Sabantuy ütte. Bu milli bäyrämneñ härqaysı üzençälekle. Azatlıq xäbärçesenä yäkşämbe könne Tatarstan belän Başqortstan çigendäge Minzälä Sabantuyında bulırğa nasıyp buldı. Bu elekkege öyäz şähärenä 225 yäş tula. Qazannan 280, Ufadan 250 çaqrımdağı Minzälä iğtibar üzägennän yış qına çittä qalsa da, anıñ belän üzençälekle, ğibrätle sıyfatları bar. Sabantuyında alar küzgä taşlandı. Beton yullı hawa mäydanı yanındağı sabantuyı çirämendä milli kiemdäge artistlar, tarixi şäxeslärneñ rol'lären başqaruçılar çığış yasadı.
Sabantuyında rayon xakimiät başlığı Georgiy Kupriyanov aldınğılarğa büläklär tapşırdı. Bäyrämgä şuşı rayonda tuıp-üskän häm xäzer respublikanıñ iminlek Sovetı särkätibe general Vener Sälimov, Eçke eşlär ministrı urınbasarı Yevgeniy Däwlätşin, Tatrespotrebsoyuz oyışması citäkçese Mäxmüt Fättäxov häm başqa zur qunaqlar kilgän ide. Qunaqlarnı çaqırıp toruçı öylär yanında da, Qazan tatarları, keräşen tatarları, rus cırları ber-bersenä ürelep bardı. Minzälä bäyrämeneñ üzençälekläre şundıy - monda milli uyınnar ğına bulmadı. Mäsälän, zur çanğa salınğan sudan qul belän balıq totu, suda yözgändä ayaqqa kiä torğan yözgeç kiep yögerü, rezin arqanğa bäylängän kileş büläk alırğa yögerergä tırışu küzgä taşlandı. Älbättä, at häm avtomobil uzışları, köräş bäyrämneñ üzägendä buldı.
Nindi soñ ul Minzälä, digän sorawğa cawap bik ğibrätle. Awıllarda 15 meñ, şähärdä dä näq 15 meñ keşe yäşi. Läkin şuşı keçkenä Minzälädä danlıqlı professional tatar teatrı, pedagogika, meditsina kolledjları, awıl xucalığı texnikumı häm başqa uqu yortları bar. Minzälä xalqınıñ 20 protsentı, yäğni 3 meñ keşese - student. Minzälälelärneñ 50 protsentı - tatarlar, ä ikençe yartısı - ruslar häm marilar.
Rimzil Wäli
