Accessibility links

шимбә, 3 декабрь 2016, Казан вакыты 22:42

Udmurtiäneñ Votkinsk şähärendä Sabantuyı respublikada berençelärdän bulıp uzdı


Udmurtiädä 70tän artıq millät wäkile yäşi. Alarnıñ 26sı milli oyışmalarğa berläşep, tuğan telen, mädäniäten, ğöref-ğädätlären saqlap qalu, üsterü yünäleşendä eş alıp bara. Milli oyışmalar cäy başında milli bäyrämnären uzdıruğa zur ähämiät birä. Udmurtlarnıñ Gron Bıdton, Gerber, marilarnıñ Semıg, besermännärneñ Qorban, tatarlarnıñ — Sabantuy bäyrämnäre yıl sayın uzdırıla. Alar barısı da tatarlarnıñ yazğı eşlär tämamlanğaç uzdırıla torğan Sabantuylarına oşağan cıyınnar. Bıyıl respublikada milli bäyrämnärgä startnı Votkinsk şähärendä yäşäwçe millättäşlärebez birde. Anda ütkän şimbädä Saban tuyı bulıp uzdı. Anı şähärneñ «Duslıq» mädäni oyışması, tatar ictimaği üzäge, «Yubileynıy» mädäniät sarayı belän bergäläp şähär administratsiäse yärdämendä oyıştırdılar. Könneñ salqınça, bolıtlı bulıp toruına da qaramastan saban tuyına xalıq baytaq cıyılğan ide. Millättäşlärebezne bäyräm belän qotlarğa Votkinsk şähäre merı Aleksandr Kuznetsov häm İjaw şähäreneñ Lenin rayonı administratsiäse başlığı Andrey Pianzin citäkçeselendä delegatsiälär kilgän ide. Şulay uq milli bäyrämdä respublikanıñ mädäniät ministrınıñ yaña bilgelängän urınbasarı Nailä xanım Sobina, milli säyäsät ministrlığınnan baş belgeç Fändüs Xucin da qatnaştı. Nailä xanım bäyräm xalıq cıyılğan mäydanda ğına çiklänmiçä, härber tatar ğailäsendä buluın teläde, Fändüs Xucin bäyräm belän qotlap, milli eşlärne oyıştıruda aktiv qatnaşqan Cämilä Räşit qızı Ğälieva häm «Duslıq» mädäni oyışması citäkçese Mäğsum ağa Ğazimcanovqa ministrlıqnıñ räxmät xatların tapşırdı. Bäyrämne açu tantanası beraz başqa tösmer dä aldı.

Ul Votkinsk şähärendä uzğan Saban tuyınıñ üzençälege dä buldı. İjaw şähäreneñ Lenin rayonı häm Votkinsk şähäre administratsiäläre arasında duslıq häm xezmättäşlek kileşüenä qul quydı. Kileşüne Votkinsk şähäre merı Aleksandr Kuznetsov belän Lenin rayonı administratsiä başlığı Andrey Pianzin imzaladı. İke administratsiä arasında duslıq cepläre küptän bulsa da, kileşü nigezendä eşlär tağın da canlanır dip niätlänä alar.

Lenin rayonı administratsiäse citäkçese Andrey Piänzin rayon inde biş yıl Tatarstannıñ Ägerce şähäre belän mädäni kileşü tözep, bu yaqtan bik küp eşlär başqarıldı, xätta ul kileşü xäzer iqtisadıy yünäleş aldı dip, älege kileşüneñ dä uñışlı buluına şiklänmi.

—audio—

Kileşügä bäyä birep milli säyäsät ministrlığınnan baş belgeç Fändüs Xucin häm İjaw şähäreneñ «Yaqtaşlar» cämğiäte räise Fäyrüzä Bahawieva bolay didelär

audio —

Citäkçelär kileşügä nigezlänep plannar qordı, ä mäydanda bäyräm üz çiratı belän däwam itte. Säxnädän cırlar, iyüllär ber—bersenä ürelep bardı, mäydannıñ törle poçmaqlarında Sabantuyına xas bulğan milli uyınnar, yarışlarda, uyınnarda yäşlär dä, ölkännär dä üzeneñ köçenä turı kilgänen saylap, qatnaştı. Xalıq könneñ bolıtlı, salqınça buluınnan qurıqmağan, küpläp kilgän. Käyefläre dä kütärenke ide.

—audio—

Bıyılğı bäyrämne oyıştıruda tağın ber üzençälek, elek şähär buylap cır—iyüllär belän yörmäsälär, bıyıl bu yolanı da ütädek, dip söyläde tatar ictimaği üzäge räise wazifasın başqaruçı Mäğsum ağa Gazimcanov.

Xämidä Ğayfullina, «Azatlıq» radiosı, Udmurtiä.

XS
SM
MD
LG