Soñğı Sabantuy bıyıl iyünneñ 20sendä Dimitrovgrad (Mäläkäs) qalasında uzaçaq.
Tatarstannan ayırmalı bularaq, Sember ölkäsendä Sabantuy waqıtı, oyıştıruçılarnıñ üz mömkinleklärennän çığıp häm kürşeläre belän kiñäşläşep bilgelänä, çönki ber-bereñä qunaqqa yörü säbäbe dä ul - Sabantuy.
Sabantuylar, yıldağıça, Sember häm Mäläkäs qalalarında bulaçaq. Annan tış 16 rayon sabantuyı bilgelängän. Çardaqlı, Novospassk, İske Qulatqı, Qarsun rayon sabantuyları rayon üzäklärendä bulaçaq. Ä başqa rayonnarda isä, çirat belän, tatar awıllarında uzdırıla. Andıy awılları bulmağan qayber rayonnarda bu bäyräm qatnaş xalıqlı awıllarda oyıştırıla. Sengiley rayonı Sabantuyı Krasnıyy Gulyay awılında bulaçaq, ä Terenğa rayonınıqı Skugareevkada maynıñ utızında uzdı da inde.
Annan tış ayırım tatar awılları üz Sabantuyların da, mömkinlektän çığıp, oyıştırırğa tırışalar.
Weşqayma, Sura, Kuzovat, Bazarlı Sızğan rayonnarında bu bäyrämneñ bulmayaçağın anda tatarnıñ az buluı belän añlatsalar, Ul'yanov rayonında bulmawı – anıñ citäkçese Fedor Grişinnıñ bu bäyrämgä qarata “üzençälekle” mönäsäbätennän.
Uzğan yal könnärendä Sabantuylar İske Qulatqı rayonı üzägendä, Çardaqlı rayonı – Abdulla, Çınlı rayonı – Yaña Timerçän, İske Mayna rayonı İske Qızılsu awıllarında uzdı
Xalıq bu bäyrämneñ yañadan qaytuına bik qänäğät, läkin onıtılırğa duçar itelgän bäyräm baytaq yuğaltular belän, zäğiflänep qayttı. Ölkän yäştäge apa-ağaylar milli bäyrämebezneñ elekke yıllardağı kürkäm yaqların sağınıp söylilär. Zaman cilläre arqasında ütep kergän küreneşlärneñ ayıruça borçu tudıruçıları – araqı tä'sire, milli köräşneñ dan- şöhrät qazanu tügel – baylıq tuplaw çarasına äylänüe, köräş mäydanın professionallarnıñ basıp aluı häm şunıñ näticäsendä ğammäwilekneñ yuğala baruı, räsmilek belän bergä urıs teleneñ dä ütep kerä başlawı häm başqa qoytı küreneşlär.Şöker, di xalıq, bäyrämebez töp wazifalarınnan berse - tuğannar, duslar belän aralaşu çarası buluın saqlap qala. Şulay uq millätne tuplawğa da zur öleşen kertä äle.
“Azatlıq” radiosı, Ayrat İbrahim, Sember.
