Accessibility links

якшәмбе, 4 декабрь 2016, Казан вакыты 11:24

Tatarstannıñ Fännär akademiäse yäşärerme?


15 yıl elek tözelgän Fännär Akademiäseneñ xaqıqi äğzäläre häm çlen-korrespondent dip yörtelgän möxbir-äğzäläreneñ urtaça yäşe – 70 kä yaqınayğan. Xäzerge çorda Tatarstannıñ iñ yuğarı fänni oyışmasın yäşärtü, zamançalaştıru maqsatında respublika citäkçelege berniçä akademik häm äğza-möxbir urını bülep birgän. Çärşämbe könne, 9 yündä, Fännär Akademiäseneñ büleklärendä şuşı yuğarı fänni däräcägä nämzätlärne saylaw bulaçaq. Aldan matbuğatta iğlan itelgän belgeçleklär buyınça bäygedä qatnaşuçılardan iñ layıqlıları akademiäneñ tarmaq büleklärendä saylanğan xäldä, alar şuşı uq könnärdä Fännär Akademiäseneñ ğomumi cıyılışında raslanırğa tieş.

Älege bäygedä qatnaşırğa teläwçelärneñ sanı bik küp. Arxeolog Fayaz Xucin, ädäbiät belgeçe Nail Wäliev kebek nämzätlärneñ belgeçlege buyınça citdi köndäşlär bulmasa, tarix, etnologiä, pedagogika tarmaqlarında konkurs şaqtıy qatlawlı. Mäsälän, pedagogika buyınça äğza-möxbirlekkä nämzätlär arasında fänni xezmätläre belän Rusiädä häm çit illärdä tanılğan fännär doktorı Gölnar Xäsänova, bik küp metodik säbäplär yazğan Änwär Xuciäxmätov, matematik Cäwdät Söläymanov, rus tele häm ädäbiäten uqıtu metodikası belgeçe Valer’yan Ğabdulxaqov häm başqalar bar. Barlığı ber urınğa 6 däğwäçı turı kilä. Tarix häm etnologiä fännäre buyınça da ber urınğa 3 yaña buın ğalime däğwä itä. Milli mäs’älälär häm tatar etnologiäse buyınça belgeç Damir İsxaqov belän berrättän monda Qazan däwlät universitetınıñ tatar filologiäse fakul’tetı dekanı İskändär Ğiläcev, Ministrlar Kabinetınıñ Fän häm uqu yortları bülege mödire Ramil Wäliev äğza-möxbir bulırğa omtıla. Eş monda şuşı fänni däräcägä iä bulıp, 10 meñ sum aylıq östämä eş xaqı aluda ğına tügel, ä zamança tarix fänendä kiläçäkne bilgeläwgä xälitkeç öleşne kertü xoquqın aluda. Akademik yäki äğza-möxbir buluçılar çağıştırmaça möstäqillekkä iä bulıp, yaña möhim proyektlarğa kereşü mömkinleklären dä arttıralar. Älbättä, fändä köndäşlek, şäxsi häm fänni qaraşlarnıñ täñgäl kilüe yäki kilmäwe dä zur rol’ uynıy.

Çärşämbe könne Mirza Mäxmutov citäklägän xoquq häm sotsial iqtisadi problemalar bülegendä toruçı tawış birergä xoquqlı 9 akademiknıñ saylaw öçen kiräkle yartısınnan kübese kilä alırmı? Çönki alarnıñ beräwläre awırıy, ä Vasiliy Lixaçev kebek qayberäwläre xäzerge waqıtta bötenläy Qazanda tügellär. Şulay itep, pedagogika buyınça äğza-möxbirne saylawçı bu bülektä mäs’äläne kvorum xäl itärgä mömkin. Ä tarixçılar Damir İsxaqov, İskändär Ğiläcev, Ramil Wälievnıñ berse bulsa da yäşeren tawış belän komissiä äğzäläreneñ öçtän ike öleşeneñ fatixasın alırmı, yuqmı? Bu fänni intriga 9 yün könne çişelergä yäki tağın da qatlawlıraq itep töyenlänergä mömkin.

Gölnaz İlgizär

XS
SM
MD
LG