8 iyün könendä Qazanda Däwlät xezmäte institutında fänni-konferensiä ütte. Ul «cämğiät häm däwlät» digän temağa bağışlandı. Anda şulay uq, cämäğätçelek häm xakimiätlär üzara mönäsäbätlärne niçek tözergä tieş, administrativ reforma, zamança däwlät idäräse turında da notıqlar uqıldı. Däwlät oyışmaları öçen xezmätkärlärne äzerli torğan institutta grajdanlıq cämğiäten niçek añlıylar ikän?
Küptän tügel, Qazanda, Federalizm institutı ütkärgän konferensiädä, grajdanlıq cämğiätenä milli häm dini küzlektän çığıp qarağannar ide. Bu fänni cıyılışta mäs’älägä xakimiätlär häm ğadi watandaşlar yağınnan kilep qaradılar. Mäsälän, fänni cıyında çığış yasağan Prezident apparatı xezmätkäre Roman Beläkov, cämğiätneñ häm xakimiätlärneñ añlaşıp yäşäwe, däwlät köçle bulğan oçraqta, watandaşlar cawaplı bulğan waqıtta ğına mömkin, dip isäpli. Älege däwlät xezmätkäre äytkänçä, keşelär törle ictimaği oyışmalar tözi alsın öçen, xoquqların yaqlıy alsın öçen, däwlät şartlar tudırırğa tieş. Şul ul waqıtta ul, köçle xakimiät däwlät yaqlı. «Azatlıq» radiosı xäbärçese, älege belgeçtän, latin grafikasın tıyu, watandaşlar cämğiäte, keşe xoquqları küzlegennän qarağanda niçek kürenä, digän soraw birde. Roman Beläkov fikerençä, ber yaqtan federal yaqnıñ tıyu kertüe, qanunnarğa turı kilmi. Ä ikençe yaqtan, bu bik qatlawlı mäs’älä. Prezident idäräse xezmätkäre uylawınça, latin grafikası mäs’äläsendä, ber könlek mänfäğätlärne küz aldında totıp tügel, ä däwlätneñ häm millätneñ fundamental ixtiaclarınnan çığıp eş itärgä kiräk. Bikä Timerova.
