Accessibility links

шимбә, 3 декабрь 2016, Казан вакыты 20:40

Küñelne däwalawçı tabiplar kiñäşmэsendä


Sişämbe könne Rusiäneñ barlıq töbäklärendäge psixik awırular tabipsız qalğan diärgä bula. Ul baxırlar bu könne dä tınıç mikän? Alar niçek ğömer kiçeräder, äytep bulmıy. Ä menä alarnıñ iñ yaxşı tabipları Qazanda cıyılıp kiñäş tota. Qazan sanatoriäseneñ utırışlar zalında Bötenrusiä psixiatriä belgeçläreneñ 13nçe kiñäşmäsenä häm psixiatrlarnıñ 5nçe kiñäşmäsenä barlıq töbäklärennän 250läp ğalim häm baş tabiplar, sälämätlek saqlaw xezmätkärläre cıyıldı. 11nçe iyüngä qädär baraçaq bu kiñäşmädä qatnaşuçılarğa respublika citäkçelege isemennän premyer ministrı urınbasarı möräcäğät itte. Sälämätlek saqlaw ministrı K.Zıyätdinov, respublika prokurorı Qafil' Ämirov ta bar ide. Mäskäw qunaqları arasında ataqlı psixiatriä ğalimäse akademik Tat'yana Dmitrieva, Rusiäneñ eçke eşlär ministrlığınıñ tikşerü komitetı başlığı urınbasarı Boris Gavrilov kebek citäkçelär bar.
Psixiatriä bügen mäxkämä psixik ekspertizasın yasağanda yış qullanıla. Tat'yana Dmitrieva üz çığışında şundıy mäğlumatlar kiterde. Narkomaniä, alkogolizm çirläre beraz tübänäysä dä, stress häm psixik awırular soñğı un yılda bik yuğarığa mende, bigräk tä irlär arasında. Häm näticädä irlärneñ üz üzlären üterü oçraqları bik nıq artqan. Xäzerge zaman keşeläreneñ, bigräk tä yäş buınnıñ häm irlärneñ psixik yaqtan çirläwe Rusiä külämendä dä Tatarstanda da arta baruı sotsial' kierenkelek, yäşäw şartları belän bäyle.
Yärdämgä moxtaclar psixiatrda däwalanu çit illär öçen ğädäti xäl bulsa, Rusiädä äle barı tik cinayät yasawçılarnı xökem itkändä tikşerälär. Psixikanı däwalawğa moxtac bulğan keşelär teläsä nindi qatlamda oçrıy.
Mondıy çirgä ğadi eşçe dä, yuğarı citäkçe dä duçar bula. Prokuror Qafil Ämirov şundıy misal kiterde. Ber bankirğa cinayät eşe quzğatılğan. Ul ber-niçä yöz million dollarnı üz isemenä küçerep quyğan. Qulğa alınğaç xökem-psixik ekspertizasın ütkändä anıñ epilepsiä öyänäkläre açıqlana. Bankir psixiatriä şifaxanäsenä salına. Ämma küp tä ütmi ul aqça tüläp şifaxanädän qaça häm bügenge köndä dä qaydadır qaçıp yöri. Bu oçraqta psixik awırudan xäyläne ayırıp aluı bik çiten ikän. Qazandağı cıyılışta ekspertlarnı äzerläw, çirlelärne däwalaw turında söyläşep, aqnı qaradan, aqıllını tiledän ayıru täcribäsen urtaqlaşalar.
Al'bina Zäynulla, Qazan.

XS
SM
MD
LG