Accessibility links

шимбә, 10 декабрь 2016, Казан вакыты 19:31

Yalğan saylaw bülletennäre yasawda ğäyeplänüçe mäxkamä qarşına basa


Başqortstanda uzğan yılda republík prezidentın saylawlar çorında yalğan byülletennär äzerläwgä bäyle cinayät eşe mäxkämägä tapşırılğan. Bu xaqta Başqortstan prokuraturındağı ber çığanaq 8 yün könne Rusiäneñ «Rosbalt» mäğlümat agentlığına xäbär itkän.

Ul tarixnı qısqaça ğına iskä töşerep ütik äle. Uzğan yılda Başqortstan prezidentın saylawlar kampanísı çorında Ufada Başqortstan prezidentı xakímítı qarşındağı «Mir peçati» dip atalğan näşriättä yalğan saylaw byülletennäre tabıluı xaqındağı iseñ kitärlek xäbärlärne küplär xäterlider äle. Ul çaqta basmaxanä eçendäge xezmätkärlär, üzläreneñ qırın eşlären yäşerü öçen, republík Eçke eşlär ministerlığı häm prokuratur xezmätkärläre kilep citkänçe, byülletennärgä ut törtep, anda yanğın da çığarğan ide. Tönlä bulğan bu şaw – şulı cäncal waqıtında qanunsız basılğan saylaw byülletennäreneñ küpmeder öleşe ut eçendä yuq itep ölgerelgän dip xäbär ittelär. Prokuratur citäkçeläre, atap äytkändä, republík baş prokurorı urınbasarı Vladimir Qorostılev yalğan saylaw byülletennäreneñ Başqortstan prezidentı xakímítı başlığı Radiy Xäbirov quşuı buyınça eşlängänlegen şul könne ük kiñ mäğlümat çaralarına tarattı.

Älege raslawdan soñ, saylawlarda ğämäldäge prezidentnıñ köndäşläre bulğan Ralif Safin belän Sergey Weremeyenqo ğärizalarına nigezlänep, Başqortstan prokuraturı älege ğawğa buyınça cinayät eşe quzğatqan ide. Prezident saylawları tämamlanğaç ta, republík prokurorı Florid Bayqov belän anıñ urınbasarı Vladimir Qorostılev «üz wäqälätlären uzıp eşlädelär» dip ğäyeplände. Şunnan soñ Florid Bayqov üz teläge belän prokuror wazífasın qaldırıp kitte. Ä Vladimir Qorostılevnı Ulyän ölkäse prokuraturına eşkä küçerdelär.

Bu yıl başınnan birle älege cinayät eşeneñ nindi basqıçta buluı xaqında mäğlümat yuq däräcäsendä ide. İnde menä açıqlıq kerä başladı. Cinayät eşendä berdänber ğäyeplänüçe dip «Mir peçati» basmaxanäseneñ direktorı Marat Wäliev kürsätelgän. Ul yalğan doqumentlar äzerläwdä ğäyeplänä. Cinayät eşe artaban tikşerelü öçen Ufa şähäreneñ Kirov rayonı mirowoy mäxkämäsenä tapşırılğan. «Azatlıq» radíosı xäbärçese, anda telefonnan şaltıratıp, bu eşneñ täğäyen qaysı xaqim tarafınnan qaralaçağın beleşte. Älege cinayät eşen mirowoy mäxkämä xaqime Güzäl Rif qızı Färxetdinowa tikşeräçäk ikän. Mäxkämäneñ täwge utırışı 15 yündä irtänge säğät unda ütäse di. Ämma Güzäl Färxetdinowa «Min bernindi qommentariylar da birmim», dip bezgä nindi dä bulsa mäğlümat birüdän baş tarttı.

(awdio)

Şulay itep bez Ufada bıltır prezident saylawları çorında tabılğan yalğan saylaw byülletennärenä bäyle mäxkämä eşe xaqında älegä bik az ğına mäğlümat belä aldıq. Mäxkämä utırışı yabıq işeklär artında ütä häm aña jurnalistlar kertelmi. Tik bügennän ük inde küplärne ber närsä ğäcäpländerä – ni öçen bu cäncalda barı tik näşriät direktorı ğına ğäyeplänä. Ul üz beldege belän genä qanunsız byülletennär bastırıp yattımı ikänni?

Fänis Fätxi, Ufa.

XS
SM
MD
LG