Accessibility links

Кайнар хәбәр

Kemder yal itä, kemder - imtixannar tapşıra


Respublika mäktäplärendä bu könnärdä çığarılış imtixannarı däwam itä. 11 klassnı tämamlawçılar sişämbe könne matematikadan yazmaça imtixan tapşırdılar. Ä berdäm däwlät imtixanın –EGnı kertüdä eksperimentta qatnaşuçı Rusiäneñ küp kenä töbäklärendä isä matematika buyınça belemnärne yañaça, testlar yärdämendä tikşerdelär. İnde belgänegezçä, Tatarstan älegä bu eksperimentta qatnaşmıy. Alay da, telägän keşe üz mömkinlegen sınap qararğa mömkin ide. Läkin respublikanıñ Mäğärif ministrlığı wäkile süzlärenä qarağanda, mäğärif büleklärenä andıy teläwçelärneñ möräcäğäte bulmağan. Xäyer, bu ällä ni säyer dä tügel. Berdäm imtixannar inde menä-menä böten Rusiä buylap kertelä, dip torsalar da, küp kenä yuğarı uqu yortları älege imtixannıñ näticälären tanırğa aşıqmıylar. Menä Rusiäneñ iñ abruylı yuğarı uqu yortınıñ berse – Mäskäw däwlät universitetı da uqırğa kergändä abiturientlarnıñ EG yärdämendä cıyğan ballar sanı tügel, ä, iskeçä, kerü imtixannarınıñ näticäse qaralaçaq, dip belderde. Tatarstannıñ yuğarı uqu yortları da şulay uq EG – Berdäm däwlät imtixannarınıñ näticälären qabul itmilär.

Çığarılış klass uquçıları bu aralarda qatlawlı sınawlar – imtixannar birep yörsä, uqularnı tämamlağan başqa balalar inde yal itügä kereşte. Bu könnärdä balalar öçen berniçä yal lagerı eşli başladı. Şularnıñ berse - Qazan yanında urnaşqan Çayka isemle balalar lagerı. Ul bik üzençälekle lager. Monda Rusiäneñ 16 töbägennän kilgän 190 tatar balası cıyıldı. Çaykağa Çiläbe, Ul’yan ölkälärennän, Başqortstan, Udmurtiä häm başqa töbäklärdän yäş millättäşlärebez cıyılğan. Balalar monda inde 7 yündä ük cıyıla başladılar. Läkin lagernıñ töbäkara smenasınıñ räsmi açıluı bar uquçılar cıyılıp betkäç, atna azağında ğına bulır dip kötelä. Alar 24 yüngä qädär Tatarstanda yal itäçäklär. Alay ğına da tügel, yal belän berrättän çit töbäklärdän kilgän balalar tatar tellären dä kamilläşteräçäk. Şulay itep, Qazanğa kilgän tatar balaları cäyge yal waqıtında da uquların onıtmıy.

Gölnaz İlgizär

XS
SM
MD
LG