Accessibility links

сишәмбе, 6 декабрь 2016, Казан вакыты 06:05

Niçek itep zamança texnologiä milli mirasnı saqlarğa yärdäm itä?


Tatarstan milli muzeyında, inde ikençe kön rättän, muzey eşendä zamança texnologiälärne qullanuğa bağışlanğan seminar bara. 10nçe iyündä, şuşı çara qısalarında, Rusiä tarix muzeyınıñ multi-media bülege başlığı Kiril Meyerov kilep, cämäğätçelek aldında çığış yasadı. Ul eşli torğan Rusiä tarix muzeyı inde küptän internetqa çıqqan häm bay muzey cıyılmaların räsemgä töşerep, kompyuterğa kertep, internet aşa qaraw mömkinlegen birä. Anıñ Tatarstandağı kollegaları da Rusiä häm dönya muzeylarınnan qalışmıy. Berläşterelgän milli muzeynıñ internet säxifäse (www.tatar.museum.ru) qullanuçılarğa öylärennän genä kürgäzmälärne qarap çığarğa mömkinlek birä. Milli muzey citäkçeseneñ urınbasarı Gölçäçäk Nacipova, «Azatlıq» radiosına birgän intervyusında, tatar mädäniäten Evropağa tanıtu öçen ber yaña proyektta qatnaşırğa isäbe turında söyläde. Süz, milli muzeynıñ tatar telendäge internet säxifäsen maxsus tellär programmasına kerü turında bara. Parijda, Evropa illäre mädäniätenä bağışlanğan, maxsus sayt yasala ikän. Anda 15 tel häm alar xaqında mäğlümatlar kerteläçäk. Törki tellärdän berençe bulıp, tatar telendäge internet säxifägä anda qatnaşırğa täqdim itelä, dide Gölçäçäk Nacipova. Läkin anıñ öçen bik küp finans çığımnar taläp itelä. Berençedän, muzey portlınıñ tatar telendäge säxifäsen yasap beterü taläp itelä. Annan soñ, xalıqara proyektlarda qatnaşu öçen, kompyuterlaştırılğan materiallarnı Evropa illäre standartlarına turı kiterü sorala.

Ä älege seminarda milli häm respublikanıñ başqa muzey wäkilläre niçek itep kompyuterlar, digital fotoapparat yärdämendä borınğı äyberlärne saqlap qalırğa, dönyağa kürsätergä öyrände. Mäsälän, borınğı qulyazmalarnıñ zamança käğäzdä küçermäsen yasaw, kürgäzmä turında mäğlümatlarnı maxsus ekrannarda kürsätü, global çeltärgä räsemnären urnaştıru serlärenä töşende. Tuqay muzeyın internettan qaraw niçek kenä küñelle bulsa da, ul çornıñ töp nösxädäge käğäz, kitaplarnı saqlaw eşendä muzey xezmätkärlärenä barı iğänäçelär yärdämenä genä ömetlänergä turı kilä.

Bikä Timerova.

XS
SM
MD
LG