Accessibility links

шимбә, 3 декабрь 2016, Казан вакыты 14:44

Tatarstanlılar Rusiä könen bäyräm itälärme?


Şimbä, 12 yün könne, Rusiä köne bäyräm itelä. 90 yıllar başında ğına bäyräm itelä başlawına da qaramastan, bu kön inde şaqtıy ğına isem dä alıştırıp ölgerde. İsegezgä töşerep ütik, älege kön 1990 yılnıñ 12 yünendä Rusiäneñ däwlät suverenlığı turında deklaratsiäse qabul itelü uñayınnan bäyräm itelä başladı. Räsmi räweştä anı 1994 yılda Rusiä prezidentı Boris El’tsinnıñ qararınnan soñ bilgeläp ütä başladılar. Ul waqıtta 12 yün Bäysezlek köne dip atala ide. Läkin 1990 yılğa qädär dä şaqtıy möstäqil bulğan Rusiä Federatsiäsendä älege bäyräm xalıqta ällä ni populyarlıq qazanmadı. Ğadi xalıq arasında anı bäyräm itüçelär az ide. 1998 yılda şul uq Boris Nikolaeviç 12 yünne Rusiä köne itep bäyräm itärgä digän täqdim kertte. 2002 yıldan başlap isä älege bäyräm inde räsmi räweştä bilgeläp ütä başladılar. Bu könne Mäskäwdä Rusiäneñ bar töbäklärennän kilgän wäkillär Qızıl mäydannan ütälär, törle bäyräm çaralarında qatnaşalar. Anda tatarstanlılar da qatnaşa. Menä bıyıl da Qazannan Mäskäwgä Rusiä könen bäyräm itärgä delegatsiä kitte. Respublikanıñ premyer-ministrı urınbasarı Zilä Wälieva citäkçelegendäge törkemdä Leninogorsk şähäre başlığı İsxaq Sadriev, Däwlät Şurası deputatı Aleksandr Fedorov, Tatarstannıñ milli-mädäni oyışmaları berlege citäkçese Säğit Jaqsıbaev bar. Mäskäwdä 12 yün könne uzaçaq çaralarda şulay uq respublikanıñ däwlät cır häm biü ansamble dä qatnaşa. Xäyer, bu könne bik qupşı häm zur çaralar ütsä dä, ğadi xalıq älege bäyrämne bik yarata, dip äytep bulmıy. Şaqtıylar xätta anıñ nindi kön buluın, närsä bäyräm itelüen dä tögäl belmilär. Xäyer, bäyräm çaraları Qazanda da bulaçaq. Berdäm Rusiä firkäse bülekçäse başqalanıñ Bauman uramında şimbä könne köndezge säğät 12dä Rusiäneñ böyeklege – xalıqlar berlegendä digän tamaşa oyıştıra. Tatarstannıñ spikerı Färit Möxämmätşin da respublika xalqın Rusiä köne belän qotladı.

12 yün – ul äle Rusiä köne genä tügel. Tatarstan öçen bu könneñ üzençälege dä bar. 1991 yılnıñ 12 yünendä respublika xalqı üzeneñ berençe prezidentın – Mintimer Şäymievnı sayladı. Şul uq könne Rusiä prezidentı Boris El’tsin da sayladılar. Läkin anda tatarstanlılar qatnaşmadı disäñ dä bula. 1991 yılda Rusiä citäkçelegenä 98 protsent tawış birä torğan waqıt äle yıraq ide. Xäyer, bu datanı istä totuçılar respublikada ällä ni yuq buğay. Härxäldä, Tatarstanda çığa torğan gäcitlärdä bernindi dä mäğlümät kürenmäde.

Gölnaz İlgizär

XS
SM
MD
LG