Accessibility links

Кайнар хәбәр

Başqortstanğa Macarstan wäkillege säfäre


Bu aralarda Başqortstan Könçığış Awropa illäre wäkillären qabul itü belän mäşğül. İnde xäbär itelüençä, bu atna başında Başqortstanda Çexiä Respublikı könnäre başlanıp kitkän ide. Bu ilneñ 35 kiñ bilgele şirkäte alıp kilgän tawarlar kürgäzmäse dä ütte Ufada. Ä 10 iyündä Başqortstanğa Macarstan respublikı wäkillege eş säfäre belän kilep töşte. Macarstan Xökümäteneñ Bäysez Däwlätlär Berdämlege illäre belän iqtisadıy bäyläneşlärne üsterü öçen cawaplı wäkile, Macarstannnıñ İqtisad häm transport ministrlığı Däwlät sekretare D'yerd Gilian citäkçelegendäge wäkillek Başqortstanğa kilüneñ täwge könendä ük baytaq qına oçraşular ütkärep ölgerde. Ä comğa könne Macarstan qunaqların respublik citäkçeläre qabul itte. Annan soñ macar duslar Başqortstan Tışqı bäyläneşlär häm säwdä ministrlığında zur söyläşüdä qatnaştı. Anda süz nigezdä Wengriä belän Başqortstan arasında iqtisadıy häm üzara säwdä bäyläneşlären kiñäytü turında bardı. Elegräk yıllarda ike respublik arasında xezmättäşlek şaqtıy tığız ğına ide. Ämma Rusiädäge 1998 yıldağı defolttan soñ üzara alış – bireş nıq kimede. Misal öçen, uzğan yılda üzara säwdä äyläneşe nibarı 3 million dollarlıq qına bulğan. Äle Ufada ütüçe söyläşülärdä Macarstan yağı Başqortstanğa baytaq qına üzara faydalı başlanğıçlar täqdim itä di. 11 iyün könne qunaqlar räsmi söyläşülärdän soñ Ufadağı berniçä şirkät eşe belän yaqınnan tanıştı häm başqalanıñ istälekle urınnarın qarap yörde.
XS
SM
MD
LG