Accessibility links

чәршәмбе, 7 декабрь 2016, Казан вакыты 15:23

Ufa «Nur» tatar teatrı tözeleşe tämam tuqtaldı


Beryülı berniçä bäyräm bergä turı kilü uñayınnan respublika citäkçeläre Ufada yaña binalar, küperlär, yullar açuda qatnaşa. Soñğı könnärdä gel qızıl tasmalar kisü belän mäşğül prezident ta, premer – ministr da. Näq menä şundıy tantanalı waqıyğalar şawlap barğan könnärdä Ufadağı «Nur» tatar däwlät teatrı taraflarınnan küñelsez xäbärlär alındı. İnde niçä tapqır yasalma räweştä tantanalı açılıp ta haman da zur säxnä zalı yağı açıla almıy cäfa çikkän tatar däwlät teatrında tözeleş eşläre xäzer bötenläy dä tuqtalıp qalğan. Bu xaqta teatrnıñ direktorı Ural Ğıyrfatullin teatrdağı çirattağı cıyılış waqıtında üze açıqtan – açıq äytkän. İnde hiç yuğı bıyıl köz zur tamaşa zalı yaña icat mizgelenä açılmasmı dip ömetlänep kenä torğanda, xäyerçegä cil qarşı digän kebek kilep çıqqan. Berençedän, tözeleşne tämamlaw öçen 40 million sum tiräse aqça kiräk ikän, ikençedän teatrda tözeleş eşlären başqaruçı «Başgrajdanstroy» trestı bölgenlekkä töşkän dilär. Şuşı xäbärlärneñ döreslekkä turı kilü – kilmäwen tikşerü öçen, bez «Nur» tatar däwlät teatrı direktorı Ural Ğıyrfatullinğa telefonnan şaltıratıp beleştek. Radiobıznı daimi tıñlawçılar xäterlider äle, Ufa «Nur» tatar däwlät teatrın tege yäki bu bäyräm aldınnan respubliknıñ iñ yuğarı citäkçeläre qatnaşlığında ike – öç tapqır tantanalı açqannar ide inde. Ul tantanalarğa ike tapqır xätta Tatarstannannıñ Däwlät Sowetı räise Färit Möxämmätşin da kilep qotlap kitkän ide. Ämma xäzer inde teatrnıñ zur zalı bıyıl da açılmayaçaq kebek kürenä. Älbättä, teatr direktorı bik ük töşenkelekkä birelmäskä tırışa häm, bälki äle, dekäbr aylarına açarbız dip ömetlänä. Ämma teatrnıñ başqa xezmätkärläre häm artistları biredä äle eşlärneñ oçı – qırıyı kürenmäwen yaxşı çamalap, zur zal 2005 yılğı icat mizgelenä açılsa da räxmät äyterseñ äle, dilär. Teatrnıñ zur zalı açıla digän wäğdälärgä ışanıp, «Nur»nıñ icadi kollektiwı, zur säxnädä uynaw öçen, soñğı ike yıl däwamında beryülı dürt yaña spektäkl premeräsın äzerläw belän mäşğül bulğan ide. Alarnıñ qayberlären säxnäläşterü öçen xätta küp aqçalar tügep Tatarstannan rejisserlar da çaqırdılar. Häm menä şul ike yıllıq xezmät älegä kiräkmi bulıp çıqtı. Artistlar äytüençä, äzer premeränı haman da uynamıy torsañ, rol'lär onıtılaçaq häm spektäkllärne yañadan ozaq qına iskä töşerergä kiräk bulaçaq. Älege köndä «Nur» teatrı icadi köçläre Salawat Yulayıvnıñ yübileyenä bağışlanğan «Gölbäzir» isemle yaña p'yesänı säxnäläşterep betep kilä. Anıñ premeräsı 15 iyündä bulaçaq di. Teatrnıñ älege yaña eşe belän dä qızıq xällär kilep çıqqan. Baqsañ, Başqortstannıñ mädäniät öçen cawaplı türäläre barlıq teatrlarğa da diärlek Salawat Yulayıvqa bağışlanğan äsär quyarğa kürsätmä birgän ikän. «Nur» teatrı kollektiwı da älege ideoloğıyk zaqazdan çittä qalmaw öçen, tanılğan dramaturg Florid Büläqovqa p'yesä yazarğa zaqaz birgän. Florid äfände älege eşkä ixlas alınğan häm Salawat Yulayıvnıñ öçençe xatını Gölbäzir xaqında äsär yazğan. Ämma anıñ täwge şäkele qısqa bulğaç, spektäklneñ ozınlığı ber säğät yarımlıq qına kilep çıqqan. Şunnan inde yaña säxnä äsären keşe qararlıq xälgä kiterü öçen, dramaturg äfände p'yesänı säxnäläşterü barışında uq aña yaña büleklären yaza barğan häm artistlarğa tapşıra kilgän. Şulay itep, östän quşılğan burıçnı ütäw öçen, barmaqtan suırıp aşıq – poşıq icat itrgä turı kilgän älege talantlı qäläm iäsenä. Mondıy spektäklneñ ber sezonda uq repertuardan töşep qalaçağın artistlar bügennän ük farazlıy inde.

XS
SM
MD
LG