Accessibility links

дүшәмбе, 5 декабрь 2016, Казан вакыты 21:53

«Berdämlek» xalıqara bäyrämgä äwerelde


İnde xäbär itelüençä, bu atnada Başqortstannıñ Yañawıl rayonında häm şähärendä «Berdämlek» dip atalğan milli mädäniätlär bäyräme başlanğan ide. Başqortstannıñ tönyäk – könbatış töbägendä ütüçe bäyräm berniçä qızıqlı çaradan tora. İñ täwdä Yañawıl şähärendä «Moñğa bay ğarmun» dip isemlängän muzıyka bäyräme başlandı. Anda ğarmunçılar bäygesenä respublik rayonnarınnan häm Perm, Çiläbe ölkälärennän 200 dän artıq keşe kilde. Yarışmada balalar da, ölkännär dä qatnaştı. Bäyräm qısalarında 11 iyün könne Böre şähärendä «Böre märäkäläre» dip atalğan bik üzençälekle tağın ber çara oyıştırıldı. Oqtyäbrskiy şähärendä isä qurayda osta uynawçılar, här yıldağıça, «Quray bäyräme»nä cıyıldı, andağı ciñüçelär dä bilgele inde xäzer. Ağidel şähärendä respublikta yäşäwçe fin – uğır xalıqları wäkilläreneñ «Kama buyı asıltaşları» bäyräme başlanıp kitte. Anda qayber çit illärdän häm kürşe töbäklärdän dä küp kenä qunaqlar kilgän. Comğa könne Yañawıl şähärendä «Moñğa bay ğarmun» isemle bäygedä ciñüçelärneñ isemnäre bäyän itelde. Tälyän häm saratskiy ğarmunnarda özderep uynawçılar arasınnan iñ köçlelärne saylap alu da ciñeldän bulmağan. Ämma jüri räistäşe, kürenekle tatar bayançısı Xalit Fatıyxov äytüençä, saf tatar rayonnarı bulğan Çaqmağış, İleş, Dürtöyle, Tuymazı rayonnarınna kilgän ğarmunçılar ayıruça osta çığışları belän soqlandırğan. Berençe urınnarnı da alardan kilgän ğarmunçılar yawlağan. Ä Gran – priğa Mişkä rayonınnan wirtuoz ğarmunçı Näcip Babiçev layıq bulğan. Çınlap ta säxnälärdä xäzerge zamança texniklar, zamança uyın qoralları östenlek itä başlağanda, çın milli uyın qorallarıbıznı da onıttırmaw öçen bik möhim älegedäy bäyrämnär häm bäygelär. «Berdämlek» tantanalarına noqtanı Ufada 12 iyündä ütäçäk Bötenrusiä fol'klor bäyräme quya. Bu könne Ufanıñ Duslıq monumentı yanında kiçke cidedä zur konsert başlana. Ğala konsertta «Berdämlek» bäyräme qısalarında ütkän bäygelärdä ciñep çıqqan häwäskär muzıykantlar häm artistlar çığış yasayaçaq.

Fänis Fätxi, Ufa

XS
SM
MD
LG