Accessibility links

җомга, 9 декабрь 2016, Казан вакыты 09:02

Tatnet: «Intel» şirkätenä Tatarstanda WiMax texnologiäsen sınarğa täqdim itelde


Şuşı könnärdä, Rusiädä eşläw tarixında berençe tapqır Qazanğa «İntel» şirkäte citäkçese Stiv Çäyz kilep kitkän ide. Komputor cihazların yasawçı «İntel» şirkäte başlığı Tatarstan xakimiätläre belän söyläşülär ütkärgäç, aña yaña texnologiälärne sınarğa täqdim yasaluı xaqında xäbär itte. Süz çıbıqsız mäğlümat taratu ısulı, Wi-Fi häm WiMax texnologiäläre turında bara. Tatarstan Prezidentı üzeneñ yıllıq yullamasında 2007 yılğa qädär här Tatarstan keşesenä internetqa totaşu mömkinlegen tudıru burıçın quyğan ide, dip yaza bu xaqta «Kommersant» gäzite. Şul uq çığanaq xäbär itkänçä, Tatarstan elemtä ministrı urınbasarı Färit Fazılcanov, «İntel» şirkäten Tatarstan mäktäplären kompyuterlaştıru programmasında qatnaşırğa çaqırğan. Älege ministr urınbasarı süzlärençä, 2004 yılda mäktäplär öçen meñnän artıq komputor satıp alınırğa tieş, şuşı programmanıñ ber öleşen WiMax texnologiäse yärdämendä tormışqa aşırılırğa mömkin bulır ide, digän bulğan Färit Fazılcanov. Çıbıqsız sistemalar Tatarstan xakimiätlärenä, kabel suzuğa qarağanda arzanraqqa töşä ikän. Läkin «İntel» şirkäteneñ Rusiädä cirendä eşlär öçen tieşle sertifikat ala almawı, Tatarstannıñ izge teläklärenä ayaq çalırğa mömkin. Tatarstan xätta bu eştä tä «İntel» şirkätenä yärdämen täqdim itkän. Şul uq «Kommersant» yazğança, mondıy ölgerlekkä «İntel» şirkäte äzer bulmağan xätta, bu şirkätneñ wäkile, äle Rusiä saqlanu ministrlığı, federal iminlek xezmäte belän radio yışlıqlar turında söyläşülär ütkäräse bar dip cawap birgän. Bu ozaqqa suzılırğa mömkin, şuña çıbıqsız mäğlümat tapşırırğa mömkinlek birüçe WiMax sistemaları Rusiä cirendä kiläse yılda ğına kertelä başlarğa mömkin.



Tatnet yoldızları bäygese däwam itä. tatnet.tatar.info saytı xäbär itkänçä, bäygegä ğarizalarnı tapşıru avgust ayına qädär ozaytıldı. Xäzerge waqıtta bäygegä 18 sayt qatnaşırğa teläk beldergän. Alar arasında yañalar da bar. Mäsälän, rt-museum.narod.ru/ kebek arxeologik muzey äzerlägän sayt jyuriğa çığarıla. tt.wikipedia.org kebek irekle ensiklopediä dä biredä kürsätelgän.www.saidash.kazan.ws/ Säydäş isemendäge mädäniät üzäge dä üzeneñ internet säxifäsen kiñ cämäğätçelekkä täqdim itärgä bulğan.

Şulay uq, kerpe.narod.ru kebek sayt ta bäygedä qatnaluçılar isemlegendä kürenä. Bu saytka qağılışlı ber yañalıq bar. kerpe.narod.ru saytınıng xucası alışındı. Başta bu sayt belän tatar fakul’tetında barlıqqa kilgän «Kerpe» oyışması qızları şöğellänä ide. Xäzer ul rahatlukum.narod.ru saytı citäkçese Rail qulına küçte. Ul «Kerpe» oyışması wäkile bulmasa da, kerpelärne bik yarata ikän. Anıñ saytında mäsälän, kerpe räsemnäre, kerpe turında multfilmnar tuplanğan. kerpe.narod.ru saytı üzeneñ yünäleşen saqlap qalır häm daimi räweştä yañarıp torır dip kötelä.



Bu atnada Rusiä kompozitorlar berlegennän internetqa qağışılışlı ber xäbär kilde. Washington ştatında yäşäwçe kompozitor Mäshüdä Şämsetdinova icadi eşçänlegen däwam itä ikän. Ul Tatar muzıkasına bağışlanğan maxsus tapşıru äzerlägän. Şuşı tapşırunı ul alıp ta baraçaq ikän. Programma KBCS digän FM radioda tapşırılaçaq ikän. Anda Mäshüdä xanımnıñ «Xıyal» yäşlär xorı başqaruındağı äsärläre, «Söyembikä» bäyetennän özeklär yañğırarğa tieş. Şulay uq, Mäshüdä xanım Amerika tamaşaçılarına Qör`ännän sürälär uqıp birergä cıyına, häm Tatarstan sänğät ostaları başqaruındağı cırlar da älege tapşıruda urın alaçaq, dip xäbär itä kompozitorlar berlege. Mäshüdä Şämsetdinovanıñ tapşırunıñ internet aşa Tatarstan keşeläre dä işetä alaçaq ikän. Ul 14 iyün könne Qazan waqıtı belän säğät 6da www.kbcf.fm saytında turı efirda tapşırılaçaq ikän.

Bikä Timerova.

XS
SM
MD
LG