Accessibility links

чәршәмбе, 7 декабрь 2016, Казан вакыты 19:36

Rusiä cirlegendä waqıf milke barı tik Tatarstanda ğına saqlanıp qalğan.


Rusiä möftilär şurasınıñ 7 fänni ğämäli konferensiäsenä islam dönyasında abruylı oyışmalar wäkilläre kilgän. Soğud Garäbstanınnan İslam üseş bankı wäkile Feddät Läyäşi, Kuveytnıñ Waqıflar idaräse general' särqatibe urınbasarı Äbdelvähab Äl- Höti Mäskäwdäge “Badr Forte Bank” wäkile Adalet Cäbiev qotlaw çığışlarında Tatarstanğa mondağı möselman cämğıätenäqäräta uñay fikerlär äyttelär. Tatarstan cömhüriätendä bäräkät bar didelär. Tatarstan Diniä näzäräte räise möfti Ğosman xäzrät İsxaqi üzeneñ qotlaw çığışında Rusiä möftilär şurasınıñ waqıfqa bağışlanğan konferensiäsen Qazanda, Tatarstanda ütkärüne qazanış dip bäyäläde. Çığışınnan soñ ul jurnalistlar yanına çıqtı häm Azatlıq radiosı tıñlawçıları öçen 7 konferensiäneñ üzençälege turında sorawğa da cawap birde. Äye Tatarstan Rusiädä uqtäbr inqilabınnan soñ 75 yıllıq çorda waqıf milke saqlanıp qalğan berdänber cir. Waqıf mal-mölkäteneñ 90 protsentı çamasın Qazan administratsiäse Tatarstan diniä näzärätenä qaytarıp birgän inde. Nigezdä bolar Qazannıñ Tatarstan, Mäcit Ğafuri, Nariman, Qayum Nasıri uramnarında urnaşqan mäçetlär häm mädräsälär. Ä bit waqıf milke bulıp mäçet mädräsälär genä sanalmıy ikän. Waqıfnıñ närsä ikäneñ, anıñ Rusiädäge xoquqi xäle turında jurnalistlarğa Mäskäw İslam universitetı rektorı Marat Mortazin añlatıp birde. Waqıfqa zavod-fabrikalar da tapşırıla ala. Alarnıñ eşçänlegennän alınğan fayda dini häm xäyriä ixtiäjlarına totıla. Waqıf milke buldıru Tatarstan qanunnarında qaralğan. Rusiä qanunnarında waqıf milkenä mal-mölkät tapşıru tärtibe häm anı qullanu çaraları älegä yuq. Marat Mortazin äytüençä Qazan konferensiäseneñ maqsatı Rusiädä waqıfnıñ statusın bilgeläw häm anı tormışqa aşıru öçen nindi qanuni nigezlämä bulırğa tieşlege turında kiñäşü. 14 iyün konferensiäneñ berençe eş köne. Ul äle tağın ike kön däwam itäçäk inşalla. Konferensiädäge qızıqlı çığışlar häm näticäse turında sezgä kiläse tapşırularıbızda ireştererbez allahı boyırsa xörmätle tıñlawçılarıbız. Yunıs Ätnäle. Qazan.

XS
SM
MD
LG