Accessibility links

пәнҗешәмбе, 8 декабрь 2016, Казан вакыты 03:14

Qızıl mäydanda “Äpipä”


Şimbädä ütkän Rusiä könen Tatarstanda şaw-şusız bilgelädelär. Vladimir Putinnıñ Mintimer Şäymievkä cibärgän qotlaw telegramması, Färit Möxämmätşinnıñ täbrik möräcäğäte matbuğatta basıldı. Mäskäwdäge bäyräm çaraları waqıtında Vladimir Putin Rusiäneñ xalıqları, millätlär, federalizm turındağı süzlären işetüçelär şaqqattılar. Çönki yıllıq yullamada häm inaguratsiä çığışında bötenläy millätlär turında sıñar ber süz dä äytelmägän ide. Qızıl mäydanda ütkän tantanalı bäyräm yöreşendä törle milli kiemnärdä milli biyüllär başqarıldı. Qazannan Qızıl mäydanğa barğan delegatsiä äğzäläre Äpipä köyeneñ şuşı tarixi mäydanda bötendönya qarşında yañğırap toruına bik qänäğät qalğannar. Qayberäwlärgä xätta Äpipä yañğırağan mizgellär başqa biyüllärdän ozağraq bulıp ta toyılğan. Kreml' eçendäge Patşa-qıñğıraw häm Patşa-tup tiräsendä oyıştırılğan bäyräm mäclesendä Tatarstan premyer-ministrı Röstäm Miñnexanov ta qatnaşqan. Ul anda biredä bulğan Mixail Fradkov, Rusiäneñ xäzerge xökümät äğzäläre, Boris Yel'sin, bilgele säyäsätçelär, ğalimnär belän qısqaça söyläşep alğan.
Televidenie A.Suvorov köymäsennän qurıqmıy
Tübän Qama bu könnärdä Rusiä televidenie jurnalistlarınıñ märkäzenä äylände. Teploxodqa utırıp, 300läp mikrofon häm telekamera ostaları Tübän Qamağa säyäxät itte. “Efirda mädäniät” dip atalğan festival'ne Tübän Qama şähär xakimiäte häm jurnalistlarnı öyrätü buyınça Mäskäwdä, Sankt-Peterburgta, Tübän Novgorodta eşläwçe televidenie mäktäpläre menä inde 3nçe tapqır oyıştıra. Bıyılğı festival'neñ üzençälege - Tübän Qamanıñ elekke şähär başlığı urınbasarı, xäzer Tatmedia agentlığı citäkçese Marat Moratov häm sponsorlar yärdäme buyınça icadi seminarlar 4 palubalı Aleksandr Suvorov teploxodında bardı. Bu tarixi köymä berniçä yıl elek Ul'yanovskiy küpere astında faciğağa oçrap, yuğarı palubasın kisterep, berniçä keşe häläk bulğan ide. Remonttan soñ, ul yañadan säfärgä çıqtı. Läkin köymä Sankt-Peterburgta çağında, anda yanğın çığıp, Qazan turistlarınıñ kiemnäre yanğan köymä dä näq şuşı Aleksandr Suvorov buldı. Bu yulı säfär uñışlı tämamlandı. Sabantuyınnan soñ iñ yaxşı televizion fil'mnar, tapşırular avtorlarına büläklär tapşırıldı. İsegezgä qalsın, televidenie jurnalistlarınıñ icadi qibla ezläwe, böten Rusiädän Tatarstanğa kilep, yıl sayın aralaşıp kitüe ğadi äyber tügel. Bu turıda ayırım xäbärne başqa könnärdä birerbez.
Citäkçelär küktä häm su töbendä
Bu könnärdä törle macaralı xällär dä bulıp tora. Qazan xakimiäte başlığı Qamal İsxaqov hawa şarı kärzinenä utırıp, kükkä kütärelde. Efir telekompaniäse kameraları aldında älege şarnıñ niçek itep oçışqa äzerlänüe, anıñ belän kem idärä itüe kürsätelde. Qazannıñ meñyıllığı ütkärgän könnärdä şundıy uq berniçä şar şähär östendä oçıp yöriäçäk ikän. Citäkçeneñ kükkä kütärelgänen qarağan tamaşaçılar ikençe ber kanalnıñ “Kürşelär” digän rubrikası astındağı reportajda Sergey Kirienkonıñ vodolaz kiemendä Tübän Novgorod ölkäseneñ ber külenä çumıp, annan çup-çar, taşlandıq äyberlär cıyıp, su töben çistartıp yörüen kürdelär. Citäkçelär kükkä mensä dä, su töbenä töşsä dä alarnıñ ğämäle säyäsätkä äylänä. Ä cir östendäge bernindi säyäsätsez macaralar da istä qala. Qazan şähäre Kirov rayonı xakimiät başlığı urınbasarı rişwät aluda ğayıplänep, qulğa alındı. Şulay uq Qazan xakimiäteneñ transport bülege mödire dä saq astında. Ul xosusıy avtobuslarğa litsenziälär birgändä üz wäkälätlären arttırıp, fayda eşläwdä ğayıplänä.
Rimzil Wäli, Qazan.

XS
SM
MD
LG