Accessibility links

җомга, 9 декабрь 2016, Казан вакыты 14:39

Sabantuyı Çallı häm Tübän Kamada ütte


Tübän Kamada Sabantuy şimbä könne uzdı. Kön bolıtlı bulıp, ara-tirä yañğır sibäläwgä dä qaramastan, şähär yanındağı Il’inka mädäni-sport kompleksına xalıq inde irtädän uq ağıldı. Sabantuynıñ räsmi açıluına qädär ük mäydan tiräsenä ütärlek tä tügel ide. Sabantuy ğädättägeçä äle genä tämamlanğan qır eşläre batırların täbrikläwdän başlanıp kitte. Aldınğı awıl xezmätkärlären mäydan urtasında büläkläp, alarnı xörmätlädelär, bäyräm älämen kütärdelär. Annan soñ Sabantuyğa kilüçelärgä zur, ğäcäyep matur tamaşa täqdim itelde. Ber meñnän artıq keşe qatnaşqan bäyräm küreneşendä tabiğätneñ yazğı yañarışı, qır eşläre, Sabantuyğa äzerlek taswirlandı.

Tamaşanıñ axırında kükkä meñlägän allı-gölle hawa şarları oçtı, ä törle çäçäklär bulıp kiengän yäş biüçelär mäydanda yaz biüen başqardı. Annan soñ mäydan urtasına Sabantuynıñ traditsion sport yarışlarında qatnaşuçılar çıqtı. Şunda uq konsert ta däwam itte. Şulay itep, här telägän keşe ber cirdä mädäni programmanı da, köräş, arqan tartu, qolğağa menü kebek tatar xalqınıñ milli bäygelären qarıy aldı. Ä qarap qına utırırğa telämäwçelär törle xalıqlarınıñ milli mäydançıqlarında cırladı, biede, küñel açtı. At çabışlarınıñ da tamaşaçılar bik küp buldı. Ğomumän, Tübän Kama Sabantuyına 100 meñnän artıq keşe kilde. Tübänkamılardan tış bäyrämdä qunaqlar da küp buldı. Räsmi qunaqlar arasında respublikanıñ spikerı Färit Möxämmätşin, Rusiä Däwlät Duması deputatı Oleg Morozov ta bar ide. Şulay uq bıyılğı Sabantuyda Efirda mädäniät dip isemlängän III Bötenrusiä televizion festivalendä qatnaşuçılar da qunaq buldı. Alar da bäyrämne bik yaratıp, tä’sirlänep qaradılar, ä yıraqtanraq kilgännäre – Sabantuynıñ iñ qızıqlı mizgellären kameralarına töşerep tä yörde. Kiçen isä, şähärneñ iñ matur zallarınıñ bersendä – Cälil üzägendä bäygedä ciñüçelärne büläkläw häm festival’ne yabu tantanası uzdı.

Gölnaz İlgizär

XS
SM
MD
LG