Accessibility links

чәршәмбе, 7 декабрь 2016, Казан вакыты 13:38

Sverdlov ölkäsendä sabantuylar başlandı


Cäyneñ yämle bu könnärendä tatar yäşägän här töbäktä şawlap-görläp sabantuylar bara. Sverdlov ölkäsendäge sabantuylar Rusiäneñ bäysezlek könendä başlandı. Xalqıbıznıñ yaratqan bu bäyräme Tübän Sırğa rayonınıñ Ürmäkäy, Ufa Şigere, Äräkäy, Şäkür, Aqbaş awıllarında, Äçit rayonınıñ Tübän Äri awılında, Krasnoufim rayonınıñ Yämanyelğa awılında uzdırıldı.

Här awılda, här cirdä sabantuylar üz tösmeren alıp, üzençälekle itep ütkärelä. Yämanyelğa awılında, mäsälän, traditsion sabantuy uyınnarınnan tış, tawğa menü yarışı da uzdırıla ikän. Mäydan yılğa yarındağı kiñ bolında urnaşqan, bolınnıñ ikençe yağın bik tekä qıyalı taw qaplap tora. Menä şul qıyağa kem aldan yögerep menep töşä, şul iñ citez, iñ qıyu yeget bulıp sanala. Ğadi al'pinistlardan bernindi straxovka bulmawı belän ayırılıp toralar bu yarışta qatnaşuçılar. Xätär buluğa qaramastan, qatnaşırğa teläweçlär bik küp.

Yämanyelğa sabantuyına Krasnoufim rayonınıñ bik küp awıllarınnan kilälär. Biredä menä inde un yıl rättän oyıştırıla bu bäyräm. Çığışı belän şuşı awıldan bulğan igelekle yeget, xäzerge waqıtta ölkä Dumasınıñ wäkillär palatası deputatı Al'bert Afzalovnıñ qazanışı inde bu. Ä menä başqa awıllarda sabantuylar bik küptännän oyıştırılmıy ikän. Üzlärendä sabantuy uzdıra almağan awıllar öçen dä onıtılmaslıq bäyräm bulsın dip tırışıp, Krasnoufim tatarlarınıñ milli-mädäni moxtäriäte, Milli Media-Xolding belän berlektä kiläse atnada, Bäyäk Tüz digän awılda regional' sabantuy uzdırırğa äzerlänä.

Sverdlov ölkäsendä tatar xalqı bik küp ük bulıp yäşämägän rayonnarda sabantuynı “Burazna bäyräme” formasında, rusça itep oyıştıralar. Sısert rayonınıñ Oktäberskiy poselogında şundıy uq bäyräm bulıp ütte. Bäyräm rusça alıp barıldı, ämma uyınnar, yarışlar sabantuy yolalarına täñgäl kilde. Biredä yäşäwçe tatarlar öçen ayırım konsert mäydançığı da bilgelängän ide. Moñlı milli cırlar, därtle garmun tawışı biregä küplärne cälep itte. Bäyräm bar xalıq öçen dä bik küñelle bulıp uzdı.

Sverdlov ölkäseneñ tönyağına taba urnaşqan Yuğarı Türä şähärendäge sabantuy yaxşı oyıştırıluı belän ayırılıp tordı. Yılğa buyında urnaşqan yäşel alanda irtädän kiçkä qädär cır-moñ tınmadı. Cıyılğan xalıq arasında ruslar da buluın isäpkä alıp, sabantuy rus häm tatar tellärendä alıp barıldı. Bäyrämgä Yekaterinburgtan tanılğan tatar cırçıları da çaqırılğan ide. Konsert xalıq küñelenä bik oşadı. Annan soñ da säxnägä menep üz ostalıqların kürsätergä teläweçlär küp buldı. Sabantuy säxnäsen matur cırlar, därtle iyüllär bizäde. Millättäşläre şundıy yämle bäyräm oyıştıruı öçen şähär duması räise Şamil Garifullinga häm anıñ belän bergä yanıp-köep yörgän duslarına olı räxmätlär belderdelär.

Sverdlov ölkäseneñ Berezovskiy şähärendä bıyıl unbişençe sabantuy uzdırıldı. Şähär urtasındağı zur stadionda bäyräm mäydanı allı-gölle itep bizälgän ide. Sabantuy parad belän başlanıp kitte. Paradnıñ başında saban bäyrämen gäwdäländerüçe cigelgän atqa tağılğan ağaç suqa, suqa artınnan igen çäçep baruçı igençe, anıñ artınnan ipi-toz kütärep baruçı malay belän qız, häm matur milli kiemnärgä kiengän, garmun tartıp moñlı cırlar suzuçı keşelär. Xalıq bu paradnı gör kilep, därräw qul çabıp qarşı aldı. Sabantuynı tantanalı räweştä şähär başlığı Vyaçeslav Brozovskiy açıp cibärde. Ul Tatarstan Respublikası prezidentı Mintimer Şäymiev isemennän kilgän däwlät telegrammasın uqıdı. Annan soñ cıyılğan xalıqnı Tatarstannıñ Uraldağı daimi wäkile Rawil' Bikbov, Yekaterinburgtan kilgän milli oyışmalar häm Milli Media-Xolding citäkçeläre qotladılar. Sabantuy barlıq bizäkläre belän balqıp, bik küñelle itep bardı. Xalıq öçen bik zur bäyräm buldı bu.Sabantuynıñ şulay ğomumxalıq bäyrämenä äwerelüenä cirle xakimiät citäkçeläreneñ mönäsäbäte töp rol' uynıy. Şähär xakimiäte başlığı Vyaçeslav Brozovskiy tatar häm başqort xalıqlarınıñ mädäni mirasın Rusiä xalıqları kul'turası arasında töp urın alıp tora dip äytep, sabantuynı böyek bäyräm dip atadı. Sverdlov ölkäsendä sabantuylar däwam itä. İñ axırğı sabantuy iyül başında bulaçaq.

Fäwiä Safiullina. Yekaterinburg.

XS
SM
MD
LG