Accessibility links

җомга, 2 декабрь 2016, Казан вакыты 23:07

16 Yün Ufada BR Tatar telle yazuçılar berlege qorıltayı ütäçäk


16 iyün könne Başqortstan tatar cämägätçelege häm zıyalıları öçen baytaq qına möhim waqıyğalar bulaçaq. Ufa «Nur» tatar däwlät teatrı binasında irtänge unda Başqortstannıñ Tatar telle yazuçılar berlegeneñ räsmi terkälgännän soñ täwge zur qorıltayı ütäçäk. Anıñ kön tärtibenä 5 mäsälä kertelgän. Töp doqlad belän Başqortstan Tatar telle yazuçılar berlege räise Räif Ämirov çığış yasıy. Annan soñ tatar prozasınıñ, tatar şiğriäteneñ häm balalar ädäbiätınıñ, ädäbi tänqitneñ bügenge xälenä analıyz yasalaçaq. İñ soñınnan Yazuçılar berlegeneñ yaña idaräse saylanaçaq häm aldağı yıllarğa eş proğramması qabul iteläçäk. Başqortstan Tatar telle yazuçılar berlegeneñ 10 yıl köräştän soñ nihäyät räsmi terkälüe respublikadağı tatar icatçıları öçen genä tügel, ä barlıq tatar cämägätçelege öçen zur ciñü bularaq qabul itelde. Ämma älegä bu berlekneñ ni üz binası yuq, ni byüdjettan bülengän aqçaları yuq. Çın döresen genä äytkändä, äle Tatar telle yazuçılar berlege qäğäzdä genä yäşäp kilä. Anı respublikanıñ bügenge xakimiätläre tanımıy häm tanırğa da telämi kebek kürenä. Şulay bulğaç, aldağı yıllarda da aña byüdjettan ayırım aqça bülenüye bik tä ikele. Bu xäldä niçek kön kürer, niçek eşlär soñ bu berlek? Anı bit ayırım tatar baylarınıñ ximaya aqçalarına ğına totu mömkin tügel. Ğomumän, bu berlekneñ kiläçägenä bulğan şik – şöbhälär anıñ citäkçesen borçuğa salmıymı? Şuşı sorawlar belän bez qorıltay aldınnan Tatar yazuçıları berlege citäkçese Räif Ämirovqa möräcägät ittek. (Yazmanı Azatlıq dulqınnarında tıñlağız).Äye, Başqortstanda Tatar telle yazuçılarnıñ üzläreneñ ayırım berlege tözelüye şatlıqlı küreneş. Ämma anıñ kiläçäktä uramda yörüçe, xäyer soranıp yörüçe belek buluınnan tatar icatçılarına bernindi fayda da bulmayaçaq. Şuña kürä çärşämbe könne ütäçäk qorıltayda tatarça yazuçı qäläm ähelläre üz berleklären däwlät qanatı astına aluların sorap möräcägät tä qabul itergä cıyına.

Başqortstan Tatar telle yazuçılar qorıltayı tämamlanğaç ta, şuşı uq «Nur» tatar däwlät teatrında Başqortstan Tatar kongressı Başqarma qomitetınıñ da çirattağı utırışı ütäçäk. Anda respublik tatarlarınıñ ağımdağı könüzäk mäsäläläre tikşereläçäk.

Utırış betkäç, «Nur» teatrı artistları tatar cämägätçelege iğtibarına üzläreneñ «Gölbäzir» isemle yaña spektaqle premeräsın täqdim itäçäk.

XS
SM
MD
LG