Accessibility links

чәршәмбе, 7 декабрь 2016, Казан вакыты 21:39

Tatar yäşlär forumına äzerlek eşläre bara


Belgänegezçä, ul 24 – 28 iün könnärendä ütärgä tieş. Älege yäşlär cıyınında Tatarstan rayonnarınnan ğına tügel, Başqortstan respublikasınnan, kürşe töbäklärdän häm çit illärdän dä tatarlar cıyılır dip kötelä. Yäşlärne närsä borçıy, forumda nindi mäs’älälär tikşereläçäk?

Forumnıñ citdi söyläşülär öleşe 5 yünäleşkä bülengän. Mäsälän, milli mäğärif häm fän mäs’äläläre belän qızıqsınuçılar Fännär Akademiäsendä cıyılıp fiker alışaçaq. Mädäniät häm milli miras seksiäse Qazan milli mädäni üzägendä eşläyäçäk. Şäxsi eşmäkärlek, tatarlarnıñ bergäläp iqtisatnı üsterü turındağı söyläşü «Qazan yärminkälär üzäge»ndä bulırğa tieş. Din häm yäşlär turında Rusiä islam universitetında fiker alışu oyıştırılaçaq. Här seksiäne bu ölkädä täcribä tuplağan däräcäle keşe alıp baraçaq. Mäsälän, milli mäğärif seksiäse eşe belän Tatar tele fakul’tetı dekanı İskändär Ğıyläcev citäkçelek itäçäk. Mädäniät häm ruxi miras mäs’älälären tikşerüçe törkem utırışın Razil Wäliev alıp barılır, dip kötelä. Şulay uq, forumdağı yäşlärne «Tatar dönyasında zamança kommunikativ texnologiälär» digän temağa bağışlanğan utırış ta qızıqsındırır, dip kötelä. Anda tatar yäşläre öçen çığıp kilä torğan gäzitläreneñ bulu-bulmaw mäs’äläläre, mäğlümat çaralarınıñ tatar telen saqlap qaludağı role, tatar internetın niçek itep üsterü, yäşlärne virtual tormışta bulsa da berläşterü kebek sorawlar qaralaçaq. Bu seksiä eşendä tatar yäşlär gäzitläre xezmätkärläre, internet saytlar xucaları qatnaşır, dip kötelä. Bu oçraşu 25 iyün könne bulırğa iteş. Könneñ ikençe yartısında Forumnıñ räsmi açılış planğa kertelgän. Seksiä eşlärenä näticä yasaw, aktual problemalarnı bergäläp tikşerü dä plenar utırışta bulırğa tieş. Axırda rezolyutsiälärne qabul itü qaralağan.Forumğa çaqırılğan qunaqlar isemlege dä iğtibarnı cälep itä. Ataqlı sportçılardan Marat İzmaylov häm Ruslan Niğmätullinğa çaqırular cibärelgän. Läkin ikese dä kilä almıy ikän. Gimnastika ostaları Alına Kabayeva, Alına Zaripova, Yana Batırışına da forumğa çaqırılğan. Tennisçılar Marat häm Dinara Safinanı da oyıştıruçılar kürergä şat bulır ide. Artistlardan Marat Başarov häm Çulpan Xammatovağa da forumda qunaq bulırğa täqdim itelgän. Älegä tanılğan millättäşlärebez kilü-kilmäwläre xaqında cawapların birmägän. Äzerlek eşläre däwam itä, forum başlanuğa 1 atna çaması waqıt qaldı.

Bikä Timerova.

XS
SM
MD
LG