Accessibility links

җомга, 9 декабрь 2016, Казан вакыты 04:57

19 Yün Ufada Başqortstan Tatar İctimağıy Üzäge qorıltayı


Bu şimbädä, 19 yün könne Ufada Başqortstan Tatar ictimağıy üzägeneñ çirattağı qorıltayı bula. Aña ictimağıy üzäkneñ respublik rayonnarındağı bülekläre räisläre häm aqtiv äğzaları da kiläçäk. Qorıltayğa Qazannan da qunaqlar kötelä. Başqortstan Tatar ictimağıy üzäge cıyınında respubliktağı başqa tatar milli oyışmaları citäkçeläre häm wäkilläre dä qatnaşa.

15 yün könne Ufada şuşı qorıltayğa äzerlek mäsälälärenä bağışlanğan utırış bulıp ütte. Anda qorıltay kön tärtibendä qaralaçaq mäsälälär buyınça soñğı tapqır kiñäşläşep aldılar. Älege utırışqa respubliktağı başqa tatar milli oyışmaları wäkilläre dä kilgän ide. Şuña kürä anda söyläşü BR Tatar ictimağıy üzägeneñ bulaçaq qorıltayı xaqında ğına tügel, ä Başqortstan tatarları problemnarına qağılışlı başqa mäsälälär turında da bardı. Ayırıp äytkändä, Başqortstanda tatar telenä däwlät tele statusı taläp itü buyınça çaralarnı däwam itärgä kiräklege xaqında citdi fiker alışu bulıp aldı. Utırışta tatar oyışmaları yañadan prezident Mortaza Räximov isemenä tatar tele statusı buyınça äzerlägän xatnıñ adresatqa tapşırıluı turında äytelde.

İnde xäbär itelüençä, Başqortstan tatar milli xäräkäte oyışmaları Başqortstan prezidentı Mortaza Räximovqa yaña möräcägät belän çıqqan ide. Anda alar yänä dä ber tapqır Başqortstanda tatar telenä däwlät tele statusı birü mäsäläsen xäl itüne sorıy. Älege xatta tatar milli oyışmaları citäkçeläre häm aqtiv wäkilläre bıyılnıñ 6 ğinwarında uq Mortaza Räximovqa bu mäsälä buyınça bergäläp möräcägät itülären iskä töşerä. Annan soñ ul xatqa xökümät yağınnan da, respubliknıñ tieşle ministrlıqları tarafınnan da bernindi dä cawap häm mönäsäbät kürsätelmäwe iskärtelä.

Möräcägättä tatar milli oyışmalarınıñ tatar tele statusın kütärü buyınça küpsanlı xatların häm belderülären iğtibarsız qaldıru tatar xalqın sanlamaw bilgese dip äytelä. Älege möhim mäsäläne xäl itügä başqort ğälimnäreneñ dä kirtälär qoruı xaqında belderelä bu xatta.

Mortaza Räximovqa bu möräcägättä tatar milli oyışmaları kiläçäktä dä üzläreneñ taläplärenä qolaq saluçı bulmasa, tatar telenä däwlät tele statusı birü mäsäläsen başqa yullar belän xäl itä başlaw xaqında kisätä. Şundıy çaralarnıñ berse bulıp referendum oyıştıru tora.

Şulay da tatar milli oyışmaları älege möhim mäsäläne tatar belän başqortnıñ ğasırlarğa suzılğan tuğannarça duslığın bozmıy ğına xäl itügä ömete buluın da assızıqlıy.

Bu şimbädä Başqortstan Tatar ictimağıy üzäge qorıltayında da Başqortstanda tatar telenä däwlät tele statusı taläp itüneñ arıtabanğı yulları häm çaraları xaqında ayırım söyläşü kötelä dip äytelde älege utırışta.

Fänis Fätxi, Ufa

XS
SM
MD
LG